前日雖然有12萬名市民上街遊行，抗議政府黑箱作業，仲要求政府要公開及交代香港電視不獲發免牌牌照死因，而前晚政總集會現場播放無綫《May姐有請》節目，全場遊行人士齊心高呼「轉台」。
你有你高呼「轉台」，無綫前晚就繼續播被電視迷「頂唔順」﹑「無聊冇新意」嘅《May姐有請》，仲落足3次雞汁，就算連整「排骨涼瓜粥」都唔放過。
不過其實無論煮中、日、法、西餐、素食、牛肉、海鮮，就算連煮雞汁嘅「阿爺」---雞，都要落雞汁去整。沒有最雞汁，只有更雞汁！除咗最經典，整沙律都要落雞汁之外，喺第19集入面，一道「紙包XO帶子」仲要落足兩次去整，認真誇張！
有網民會以為，無綫會抽起唔播前晚嗰集《May姐有請》避風頭，又或者May姐喺節目內會「哈」少幾聲，或者落少啲雞汁──當然呢啲都係一廂情願。前晚嗰集May姐繼續係乜餸都落雞汁，仲要大大支咁影住，然後佢仍然繼續：哈哈哈哈哈哈哈哈哈哈哈哈哈哈......
咁May姐呢個「哈哈功」，有冇「哈」走啲收視呢？Sorry﹗冇啵﹗
可能呢排啲人不停講《May姐有請》，大家邊睇邊鬧，想「見證」May姐點落雞汁，同埋佢喺一集內可以「哈」幾多聲，竟反高潮刺激收視勁升4點（約26萬觀眾），前晚嗰集錄到22點收視（約141萬觀眾）；而本月27日就會係《May姐有請》最後一集，之後就播另一個飲食節目，由黃淑儀主持的《吾淑吾食》喇。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！