【本報訊】饑腸轆轆的你，十五十六，今晚食飯去邊好？於是你打開手機，上網搜尋。看一看網民推介，發現某某餐廳好評如潮，就這間吧！且慢。不如再看清楚，好評背後，是真心讚頌，還是受到幕後催谷的公關宣傳？本報訪問了全港最大網絡飲食平台OpenRice（開飯喇）與多位知名食評blogger，了解食肆與公關如何透過網絡食評造勢，引君入甕。
記者：蔡元貴
本月4至10日，OpenRice突然湧現了八篇關於九龍香格里拉大酒店餐廳Tapas Bar的食評，千篇一律讚好，原來都是餐廳透過公關免費款待blogger試食後的食評，Tapas Bar因此人氣急升。這樣的情況，很多食肆在OpenRice中都有出現。
食評人一日收四邀請
「好多食肆公關都會搵網絡裏面有知名度嘅食家試食，曾經有飲食集團將OpenRice頭兩級嘅會員全部嗌晒去。」在OpenRice食家排名第一的「美食焚化爐」Philip說。他指公關試食活動十分盛行，「越來越多網絡食評人俾人邀請試食，有時一星期可以有七、八次，試過一日之內有四個邀請」。
OpenRice創辦以來共有63.6萬篇食評，單是今年9月已有474萬人瀏覽，網頁瀏覽量更超過一億次。OpenRice常務董事黃鳳鳴強調，該網站非常重視杜絕鱔稿：「我哋有一隊人專責審批食評，睇吓內容有冇失實……OpenRice唔會因財失義，如果做唔到有公信力，就會流失顧客。」
黃鳳鳴說，OpenRice也有關注食肆借用試食活動造勢的情況：「我哋睇緊係唔係去到好嚴重嘅地步，影響緊我哋嘅生態。所以我哋喺餐廳排名同評分嘅方程式入面，都會有針對性嘅加減，盡量平衡番試食活動嘅操控。如果我哋發現有食評人收受咗利益之後寫食評，我哋係唔會批准刊登。」
不過OpenRice本身也有舉辦試食活動，只是以會員聚會的名目進行。網名「LaSingers」的食評人Micky說：「我最近都收到OpenRice邀請，佢哋每年都搞殿堂飯局，專請資深嘅會員試食，食評人亦都會喺事後寫食評，30個人食完，就寫30篇。咁樣唔係咁好，我覺得OpenRice要避忌吓，佢哋作為資訊平台，唔適合介入硬性推廣。」
質素欠奉「呃到幾次？」
黃鳳鳴則回應稱：「我哋好少搞試食活動，平均每個月都冇一次，而且我哋唔會要求會員參加之後寫食評。至於同食肆合作嘅收費，只係收番人手成本，唔係廣告費用。如果外間對我哋安排有意見，我哋可以規定會員試食後唔好寫食評，但係咁樣好奇怪。」
說到底，OpenRice奉勸食肆無謂浪費資源耍花樣，消費者也不必太過看重食評的褒貶。黃鳳鳴說：「我哋有影響力，自然有食肆想利用我哋。打手係存在嘅，但係唔係我哋招惹佢哋幫食評造假，係有可能呃到人，但係呃到幾多次？如果話食評捧紅到一間食肆，但係如果間食肆本身做得差嘅話，係冇可能！我會勸佢哋，與其浪費資源喺呢方面，不如將資源放喺實質嘅地方改進食肆。OpenRice只係一個提供資料嘅平台，裏面嘅食評其實只係一種參考，好主觀，網民唔應該當呢啲指標係冇得輸嘅指引，消費者應該有自己嘅判斷，唔可以將責任畀晒我哋。」
著名blogger有嘢講： 小店獲捧紅 失地區特色
【本報訊】講飲講食的社交網絡，捧紅過許多隱世小店，也扼殺了無數地道美食。
「自從OpenRice普及咗之後，一啲經食評唱好嘅食肆，好快就會開分店，變成連鎖集團，最終令到全港各區嘅食肆都差唔多；以前香港好多地區嘅特色美食，好似沙田乳鴿、深井燒鵝、大圍雞粥，𠵱家呢啲地區獨有嘅特色已經消失咗。」blogger Micky說。
港人搵食太羊群
網名La Singers的食評人陳銘基（Micky）本身是一位日本清酒唎酒師，開設私人機構教人品酒。33歲的他不算資深食評人，但高峯期每周寫40多篇食評，因此也獲得公關公司青睞，偶爾請他試食。
成也OpenRice，敗也OpenRice。Micky說：「泰昌、麥奀同蘭芳園呢啲本來都係只此一家嘅地區小店，後來俾網絡推動，成咗名，個個幫襯兼寫食評，分店越開越多，其他一樣賣蛋撻、雲吞麵同港式茶餐嘅街坊食店，就俾人遺忘咗。」
Micky認為，香港人挑選食肆太過羊群心理，但又覺得可以理解：「有時唔到你唔羊群，你同朋友吹水嘅話題，總係離唔開某間新餐廳，好似一蘭咁，個個都去排隊打卡，你唔去過好似傾唔到偈咁。」
著名blogger有嘢講： 跟風寫食評 質素無保證
【本報訊】隨着智能手機普及，社交媒體（Social Media）功能逐漸超越傳統印刷媒體，靠網絡凝聚人氣的食評人近年異軍突起，但質素已不像以往有保證。知名blogger Patrick慨嘆：「傳統食家見識廣博，始終以前冇咁多平台發表，當然係啲真係得嘅人先有人搵佢哋寫啦。𠵱家好多人都係穿鑿附會，有啲人連有汽礦泉水都會寫做蒸餾水。」
以「猛烈南瓜在飯桌」網名寫食評的Patrick，2009年憑一篇《陰陽路十二之生化壽屍》名揚網絡。
本身任職酒店業的他，寫食評已有15年，平均每日一篇，產量驚人。最近還有出版社與他合作，計劃明年替他出書。
打手太多不可靠
回想其代表作，Patrick笑稱：「明將嗰篇係玩吓嘅，估唔到俾人推到上高登，後果不堪設想……人係衰嘅，鍾意睇人哋折墮，所以劣食永遠最多人睇。但係結果好多人抱住睇你點衰嘅心態去明將『破地獄』，曲線幫佢宣傳咗。」
去年網絡一度瘋傳一封公開招聘打手寫食評的電郵，按OpenRice會員級別訂明稿酬，每篇20至60元不等，Patrick的朋友也收到該電郵，他說：「香港人好倚賴食評去揀餐廳，以前啲食評比較可靠，𠵱家唔敢講，因為打手太多。」
著名blogger有嘢講： 試食列條件 利誘助宣傳
【本報訊】「每個星期我都會收到大約三個試食邀請，有啲會提出條件，例如食完之後一定要寫篇正面嘅食評，或者要交畀佢哋審稿，咁唔make sense，除非我冇錢開飯！」網名「為食龍少爺」的blogger Daniel對公關找blogger幫手宣傳的技倆，已見怪不怪。
受人恩惠唔讚唔得
接受訪問當天，Daniel剛好收到一名公關的電郵，邀請他參與免費試食，明言有車馬費提供，他表示不會接受。經常留意網絡食評的網民都會發現，接受試食邀請後撰寫的食評，十居其九都是好評。
Daniel不諱言說：「人嘅心理係咁，餐飯自己畀錢，自由度一定高好多。如果人哋畀錢，你會多咗考慮，例如畀個笑臉（OpenRice的正評符號）。呢個係正常人類思維，因為你受咗人哋嘅恩惠，呢個現象越來越多。」
Daniel寫食評約有三年經驗，曾出書講述飲食經驗，並為飲食雜誌寫專欄。他指出，網絡食評公信力已大不如前：「網上飲食平台，以前可信性高啲，𠵱家可能只係搵地址電話資訊嘅途徑，好多人都未必再參考裏面嘅食評。成個平台嘅會員都有可能係潛在打手，用家參考食評，應該睇吓食評人嘅資歷、粉絲數量、文章詳唔詳盡等等。」
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24