12萬市民及港視員工前日遊行爭發牌、爭公義，可惜一場不必要鹵莽衝上台，令集會留下小瑕疵。前晚約10點，當集會接近尾聲，「香港人優先」兩名成員攞住香港旗衝上台，指摘社運人士騎劫集會，結果雙方發生推撞，令在場留守港視員工愁上加愁。最終警方介入，帶走踩台人士，先至平息事件。
Billy仔為事件道歉
香港人優先成員招顯聰（Billy仔）當時在場，佢話有成員不滿左翼團體違反大會規定，在場籌款，又有左翼人士以申辦遊行者身份「騎劫」港視員工，所以趁佢哋喺台邊接受訪問時揮動香港旗抗議。Billy仔話為事件令港視員工感到唔開心道歉，佢又話叫「香港獨立」嘅人，唔係佢哋成員。據知前晚事後，組織內大佬嚴詞斥責踩台成員，Billy仔都話佢哋搞臭晒。
被指騎劫港視員工嘅民主黨南區區議員區諾軒噚日喺facebook留言，就不善之處向港視員工道歉。佢話呢次搞埋啲手尾，會考慮退出社運界，「被罵本身不打緊，但如果我任何的表態會有很多『招呼』，這便是團隊的累贅了」。
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24