美國前財長薩默斯早排因為人緣差，好多國會議員睇佢唔順眼，搞到佢做唔成聯儲局主席。但所謂有麝自然香，論學術、論從政經驗，佢的確係人才，所以不愁出路。傳聞以色列總理Benjamin Netanyahu就睇中佢，想搵佢去以色列央行打骰，以填補前行長Stanley Fisher今年中離任後嘅空缺。
可惜，薩默斯已經婉拒對方嘅好意，所以以色列總理已經改變初衷，噚晚宣佈畀家陣做緊代行長一職嘅Karnit Flug坐正，令佢成為該國首位女性央行行長。
雖然薩默斯唔吼以色列央行行長個位，但唔講唔知，Stanley Fisher喺1988至1990年曾擔任世界銀行首席經濟師，離任後就係由薩默斯接捧，而佢亦係儲局現任主席伯南克嘅博士論文導師，同薩默斯都算有啲淵源，或許因此而推薦佢去以色列，等佢冇咗個橙都執番個桔，一圓佢嘅央行行長夢。
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24