異動空間:中國食品破旗可追 - 魏力

異動空間:中國食品破旗可追 - 魏力

市況相當飄忽,呢頭好似大勢已去,轉頭又虎虎生威。有大行估本月澳門博彩收入將達350億澳門元,創歷史新高,濠賭股炒到喪晒,冇貨底實在不宜冒險追入。IGG(8002)股價不似預期,網遊股借勢調整,短炒光宇國際(1043)的算盤打不響,有貨戰友可睇多兩日,失守5.3元止蝕,否則博佢再上。另外,早排推介的奧思(1161)亦大成交起動,相當澎湃,可以趁勢走一轉,6毫子止蝕,睇0.75元。

高追風險漸高,不妨向復蘇股埋手。內地消費食品業競爭激烈,毛利率下降,中國食品(506)由年初7蚊水平下插,7月低見2.57元,8月發出全年盈警,料業績錄得虧損。壞消息盡出後,中國食品股價亦終於見到曙光,自10月初跌至2.67元,圖表形成「雙底」反彈,至今已回升四成,上日突破旗形,可順勢追入!
金英證券報告列出六大利好因素,值得參考:一、酒品及廚房食品業務回穩,下半年虧損可望收窄,明年恢復盈利;二、與可口可樂成立的合營,展開連串推廣活動,刺激近月銷售回升;三、新產品於節日銷售勝預期;四、原材料成本低企;五、今年基數大幅下降,助明年業績顯著反彈;六、食用油庫存成本下降。彭博預測,集團明年盈利可重返去年水平,意味中線有機重上7蚊水平,首站目標可先定於250日線5蚊左右。

魏力
http://www.facebook.com/2012jason

足本收睇《亂噏24》x 陳慧琳;之後有請搞笑孖寶鄭中基谷德昭玩轉再玩轉!
周一至周五《亂噏24》約定你: http://bit.ly/appletalk24