【電視風雲】
【本報訊】梁班子強搶港人電視遙控器，「梁粉」也醒覺叛變上街。有挺梁市民不忿癡心錯付，昨天在街頭大聲吶喊，直指梁振英拒向香港電視網絡發牌，反映他肆無忌憚、無法無天，指事件百分百屬於「政治決定」，質疑梁有意收窄言論自由，更擔心「今日唔上街，遲吓上街都唔畀」。一場發牌風波，「梁粉」看清梁振英的真面目。
記者：譚靜雯 林俊謙
72歲的鄧伯伯是工聯會會員，由梁振英宣佈參選行政長官開始，一直都是他的忠實「梁粉」，「嗰時佢參選我好支持，起碼我覺得佢好過曾蔭權，佢做特首香港就有希望」。可惜梁振英上任一年多以來，醜聞不絕，鄧伯伯信心開始動搖，直至今日，政府拒絕向香港電視發牌，鄧伯十分憤怒，決定走上街。
「𠵱家唔會相信梁振英」
「佢當選後多次違反承諾，仲衰過曾蔭權，今次唔發牌明顯係梁振英一手造成，上屆政府都支持，其他司長、局長都支持，連睇電視都唔畀，將來香港唔使旨意有普選。」鄧伯批評今次事件明顯是梁振英打壓，「佢想慢慢收窄我哋嘅言論自由，百分百係政治決定」。鄧伯坦言，在梁振英管治下香港已經無希望，「今日唔上街，遲吓上街都唔畀」。
20歲的黃小姐昨日首次上街，她深信梁振英為香港好，一直都支持他做特首，但事實證明她「錯愛」梁振英。她指：「佢做特首以來香港無一次好過，醜聞越爆越多，又僭建、又講大話，𠵱家唔會相信梁振英。」她更批評政府以行會保密原則不公開香港電視不獲發牌的原因：「透明度極低，好明顯有嘢隱瞞，好擔心香港未來無普選。」
「佢一手造成四分五裂」
「梁粉」黃先生也直斥梁振英肆無忌憚、無法無天，「嗰時以為佢會好過唐英年，講到可以團結香港，大家要齊心，但𠵱家香港就四分五裂，全部都係佢一手造成」。
潘先生昨在公民廣場集會，與一眾香港電視員工一起高叫口號。他表示，太太及外母一直都是梁振英的支持者，梁振英當選後曾到他居住的淘大花園做騷，「嗰時佢好受歡迎，屋企人都好支持佢，覺得佢老實、又高大，呃到唔少師奶支持」。但他批評梁振英上場後，「做嘢手段越來越差，又做唔到嘢，香港仲越來越差，今次件事真係太過份，完全無視規矩，以為無人會再信佢」。
「點解努力付出冇回報」
Kaman昨首次上街，更自製「政府黑箱作業、扼殺香港創意」的標語，她稱過去從不參與政治運動，但今次行會拒絕向香港電視發牌「太差、太不公道，太不可理喻」。她又大讚王維基用心做，用心拍，與本港其他電視台與別不同，「點解努力付出冇回報，同香港精神違背」。她又表示，現在已很少看電視，「香港劇集質素差，侮辱香港人智慧，所以一定要上街發表自己意見，改革民主制度先有希望同出路」。
曾先生強調今次為公義上街，直斥行會與政府在審批過程完全欠缺透明度，「估唔到連電視資訊都要被過濾」，擔心日後非政治、只屬民生的議題也「凶多吉少」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange