呂晨由今日起，喺呢度講吓男神又講吓花邊新聞。先小人後君子，口味呢回事好妙，「靚仔係主觀感覺，醜係客觀事實」，自認重口味。
知難而退並非全部都係懦弱嘅表現，退一步分分鐘可以退出一片海闊天空；巴西球星卡卡就係一個好人辦。今夏卡卡勇敢結束喺皇家馬德里嘅失望生涯，重返AC米蘭尋求突破。
雖然重返A米嘅星途，仍然係未知之數，不過呢位前世界足球先生喺逃出皇馬嘅陰霾、回歸聖西路後，每次現身都四萬咁口，連受傷期間人工都可以豪捨，就見佢有幾咁享受重披呢件闊別4年嘅紅黑戰衣。卡卡上周六復出以後備身份入替，最終為球隊喺主場以1:0小勝烏甸尼斯，雖然上陣唔到20分鐘，賽後卡卡就已經感性表示非常感動。
卡斯拿斯癡癡的等
卡卡「迷而知返」，喺皇馬失勢後懂得抽身而去，但被打入冷宮嘅隊長卡斯拿斯，仲係儍豬豬咁等待有日可以破冰，重奪首席門神位置，呆坐差唔多一季，直到最近先敢發出離隊宣言威逼「艦隊」。未知皇馬會唔會有所行動，因為「假使他無情，才不因你驚訝」。
球員喺球會面前何其卑微，「想要嘅得唔到，想甩嘅又甩唔到」。慘！
文：呂晨
以女性角度看球星新聞，唔用眉筆用原子筆寫低球壇百態！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange