唔知大家仲記唔記大前年同黃長興傳過緋聞、喺《星光熠熠耀保良》跳拉丁舞走光嘅保良局總理徐美琪呢？當晚佢件舞衣嘅肩帶斷咗，搞到裙頭下滑露出右胸，雖然有用乳貼，但依然震撼！前晚徐美琪捲土重來，今次係以博士銜頭喺將軍澳電視廣播城幫無綫嘅《善心滿載仁愛堂》擔任表演嘉賓，佢同國際舞蹈大師Craig & Micheline跳拉丁舞，今次佢着咗件較密實嘅舞衣，雖然年屆65歲，但身手依然敏捷，拗腰、擘腿完全難佢唔到，仲要俾舞蹈大師拋高揈嚟揈去，見佢咁好肉哋，應該唔輕，睇到都覺得好牙煙！
祥仔開騷搵曼玉
前晚慈善騷，仲有一班歌手譚詠麟、薛凱琪（Fiona）同黎瑞恩等唱歌，另有港姐朱晨麗做花樽行行企企，表現冇驚喜，難怪唔少市民都希望王維基發牌成功。阮兆祥12月會喺伊館開騷，佢話九成嘉賓都係女人，唔知老友張曼玉會唔會捧場？佢話：「佢喺香港一定嚟，我都希望開一個『祥開祥友演唱會』。」祥仔早前撞車，佢不忘搞爛gag話：「我最近好忙，俗語有話車毀人『忙』！」
而Fiona早前被指拍「反奴役日」半裸宣傳照時執走條頸，佢笑住否認：「本身頸長度係一種美感，只係我影相時縮膊感覺短咗，唔會執走條頸囉！」佢同無綫簽咗歌星合約，所以唔方便講發牌：「我嗰日有嘢做，好鍾意香港係一個自由地方，任何人遊行都可以。政府亦開通聽意見，但我唔畀意見，我同無綫簽咗合約，點都要尊重人哋。」
版主：陳基征
足本收睇《亂噏24》x陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24