【元朗→九龍塘】現年26歲的上屆落選港姐湯鎮業姪女湯洛雯，近日演出無綫處境劇《愛．回家》，劇中講述她暗戀同齡港男、苟芸慧舊愛羅天宇，料不到現實中兩人戲假情真，發展地下情。前晚羅天宇和湯洛雯到元朗秘密拍拖食酸辣粉斷正，「洛宇戀」曝光，湯洛雯昨日回應時對男方讚不絕口，讚他樣樣皆好。
湯鎮宗愛女湯洛雯去年參選港姐落敗，三甲不入，但就如願加入無綫大家庭，近日還獲派演出處境劇《愛．回家》，劇中她跟08年香港先生少年組冠軍羅天宇有不少對手戲。羅天宇緋聞多多，自從跟苟芸慧甩拖後，先後被傳搭上高海寧和蔣家旻等，然而均只是曇花一現，料不到在《愛．回家》中，湯洛雯暗戀蒙面歌手「木偶哥」，卻誤以為木偶哥是羅天宇，但現實生活上湯洛雯與羅天宇已低調撻着，發展「洛宇戀」，兩人前晚還到偏遠的元朗撐枱腳食酸辣粉，羅天宇全程冧得湯洛雯不停甜笑，其後更做柴可夫送女友返歸。
密密斟唔願走
本月剛滿26歲的羅天宇，前年被爆戀上苟芸慧，女友當時讚男方夠蠢和細心，戀情去年告吹，但兩人再見亦是朋友，羅媽媽更視苟芸慧契女般看待，苟芸慧表態要重新出發，既然復合無望，羅天宇叠埋心水另覓目標。羅天宇家境不錯，他跟隨母姓，母兼父職的羅媽媽炒樓賺大錢，近年在西貢經營燒烤場和茶餐廳。羅天宇近日暗撻《愛》劇對手湯洛雯，兩人不時微博傳情，互相轉發照片，近日更發展同「車」關係。
前晚10時許，記者發現羅天宇駕駛其Audi座駕，接載湯洛雯到元朗秘密拍拖，遠離鬧巿避狗仔隊，兩人穿上黑色情侶裝，外形襯到絕，他們在元朗大馬路的一間街坊食肆嘆酸辣粉，二人在小枱對坐，食得滋味，當時已是夜晚，店中客人不多，羅天宇放下戒心跟女友大聲談話，湯洛雯又不時望着男友甜笑。醫肚後，羅天宇埋單與湯洛雯結伴離開。他們沿着大馬路走轉入橫街攞車，街上人流不少，羅天宇和湯洛雯仍肩並肩毫不避忌，「洛宇戀」斷正。
有男友呵護備至，湯洛雯全程嘴角含春，二人往取車時，湯洛雯先把手中的罐裝飲品丟掉才上車，羅天宇見狀細心等女友走近車旁才一齊開車門。他們上車後沒即時開車，還在車廂談心五至八分鐘才肯開車，期間見湯洛雯不時微笑，看來她很欣賞羅天宇的幽默對話。
接着羅天宇開車送湯洛雯返九龍塘寓所，但車子抵達，湯洛雯都未肯下車，跟羅天宇似有談不完的情話，幾分鐘後才依依不捨下車回家，羅天宇則開車返將軍澳寓所。
大讚天宇好人
現年26歲的湯洛雯跟細她5個月的羅天宇地下情曝光，湯洛雯昨在電話中說：「我哋噚日啱啱外景完咪一齊食飯，場戲得我哋兩個，我同佢係普通朋友，我係新人，事業為重，怕兼顧唔到拍拖。」
問湯洛雯覺得羅天宇怎樣，可符合擇偶條件？她說：「佢人好好，好nice，樣樣嘢都好，我唔想話畀佢幾多分，如果講到有冇發展空間，𠵱家係太早。」她還強調前晚餐飯AA制，事後有畀錢男方。
採訪、攝影：徐錦池、陳辰
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！