據講越來越多香港人準備出走台灣，民宿好、咖啡店好、做壹傳媒都好，總之搵到樣手藝的話，就索性移居寶島，避開香港地嘅煩惱嘞。不過一班波友卻心大心細，因為台灣乜都好，係少咗個波，萬一過咗去，會唔會要斷六親戒波癮呢？有見及此，我哋特別派出記者（即是我自己）上星期親身過去搵答案，而答案係放心啦，波友們！
第一個人要搵嘅係傑拉德，呢位足球傳媒人由雜誌到講波都一籃子包辦，最緊要問佢就係有冇波睇呢個問題，「乜都有得睇，英超唔係場場有，但top 6都有啦，另外其他主流聯賽呀、世界盃呀都有得睇！咁當然要聽國語啦！」傑拉德係香港人，喺台灣讀完大學就定居於台中，貪台中環境仲舒服喎。
其實台北都好舒服吖，周末周日街上人唔多，喺巨蛋外面隨手就用yo yo卡租架單車四圍踩，喺忠孝東路踩幾多遍都冇車會同你爭路，行人仲更有禮貌。
踩到咁上下喺敦化誠品對面還車，每半小時單車收費才10蚊台幣，消費低但享受高，冇嘢講。跟住就夠鐘展開今次小記最重要行程，多得傑兄介紹認識咗一個香港足球同學會，佢哋一個禮拜踢兩三場波閒閒哋，先喺周末黃昏去到一間小學草場同越南朋友開波，同一個場地有人跑步，有小朋友玩扯鈴，其實熱鬧程度同香港嘅公園差唔多，呢日黃昏我哋就踢到天黑黑先捨得走，邊使話好似香港地要受康文署阿姐啲氣呢。
不過都唔係冇缺點，原來台灣嘅足球場好少有更衣室，就係因為咁，其中一位香港朋友Andy就邀請我哋去佢屋企沖涼，講真，我幾難想像香港地會有人肯俾汗又臭鞋又污糟兼且啱啱識嘅朋友入自己門口囉！更感動嘅係佢嘅台灣太太見到一班不速之客不但冇撳住個鼻，仲留我哋食飯㖭。
人情當然全收，但晚飯就可免嘞，因為台灣嘅夜生活，當然唔可以錯過啦！多謝你，阿嫂！
KEYMAN
now TV主持
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24