【大坑】被高登仔追捧為女神嘅黃美棋BB，最近喺fb慰問王維基間香港電視嘅員工，得到好多人畀like佢。近日佢同石修個仔陳宇琛（石仔）幫香港電視合作拍咗套劇，仲飾演兄妹，因為咁佢哋開始熟絡。前日美棋BB同石仔工作完後，就同埋經理人去咗大坑間Classified西餐廳開餐。
笑到咔咔聲
着住黑色連身短裙嘅美棋BB揀咗一個近門口嘅位坐，之後各自叫嘢食。雖然有經理人在場，美棋BB同石仔依然傾得好投契，石仔不時𠱁到美棋BB好開心，當眾笑到「咔咔」聲，着短裙向住街外嘅美棋BB換腳蹺嘅時候就春光無限，好彩都冇走光。
餐飯由夜晚7點食到8點半，石仔好有風度請客埋單。之後石仔發現有記者影相，仲好大方同美棋BB一齊接受訪問，石仔話：「雖然政府唔發牌畀香港電視，但依然好樂觀，不過未決定今日會唔會去政總示威。」傾完偈，石仔同美棋BB各自坐返自己部車離開。
採訪、攝影：畢紹基、徐錦池
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！