NBA傳奇控衞傑特由「神奇小子」打到變「神奇阿伯」，上季尾宣佈喺紐約人退休後，今季即轉任網隊教練，40歲人首當教練就帶呢支億萬大軍；網隊未開季前先幫傑特威一威，周四主場對熱火嘅季前賽中，幫佢榮休5號球衣，一眾子弟兵都好生性，大炒熱火86:62。
傑特喺01至08年打網隊，雖然攞唔到總冠軍，但兩度領呢支當時戰力普通嘅球隊殺入總決賽，輸畀湖人同馬刺，真係無話可說；傑特今季返網隊，不過由球員變成教練，一樣獲得高度重視，周四對熱火賽前舉行榮休球衣號碼儀式，成為繼「J博士」艾榮、柏杜域等之後，網隊第7位榮休號碼嘅名宿。不過傑特發言時不忘自己教練身份：「我唔知之前嘅榮休儀式，名宿之後仲有冇工作，但我就有，我希望儀式盡快完結，等我好好部署對熱火嘅比賽。」
大帝多事爆罵戰
喺呢個喜慶嘅日子，一眾網隊球員當然唔希望新任教練掃興，憑中鋒B盧比斯攻入14分同5個籃板，以24分輕取呢支兩連霸。兩軍主力賽前罵戰，似乎比賽事仲精采；話說熱火射手阿倫上季由塞爾特人轉投，俾加尼特（KG）同皮雅斯（PP）等當時仍效力綠軍嘅球員鬧到狗血淋頭，冠以叛徒之名。
勒邦占士賽前就為隊友平反：「阿倫當年俾人鬧得好慘，但鬧人嗰班𠵱家都唔喺波士頓。」矛頭直指KG同PP，PP就反駁講轉會唔係自己要求，佢一心希望留隊，只係塞爾特人唔要佢，KG就好好火咁叫勒邦占士搞好自己球隊先好理其他人嘅事。網隊同熱火今季似乎成為東岸兩支爭標大熱，未開波就先整場罵戰，增添開季緊張氣氛。而NBA另一傳奇後衞艾華遜，亦都宣佈正式退休，10月30日76人主場熱火嘅常規賽揭幕戰，就會舉行歡送儀式，送別呢位前MVP同4次得分王。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange