大名娛樂老闆林建名，前排接受有線高清奇妙娛樂台《星級會客室》主持人汪曼玲嘅訪問，喺娛樂圈打滾多年嘅佢，喺節目度大方講佢同啲後生女友交往嘅感受，試過同19歲女友拍拖嘅佢，直認同後生女交往好開心，仲可以令自己春青啲，佢話：「我同佢哋絕對冇代溝，因為好多新潮嘢我都照學。」
呻離婚痛苦
主持人亦好坦白話啲後生女係咪因為貪錢而接近林建名？佢話：「咁都擺明車馬啦，我會照顧佢嘅生活，等佢嘅生活冇問題，不過大啲就幫唔到喇，當佢哋想有更大發展嘅時候，佢哋自然唔會搵我。」講到結婚，經歷過兩次婚姻失敗嘅佢大叫怕怕：「離婚好痛苦，我𠵱家希望有個人陪我，最好唔使結婚。」
林建名透露同第二任太太生咗兩個女兒後離婚：「我哋成日鬧交，佢（第二任太太）仲話我生唔到仔。」同佢離婚後識咗新女友，當時女友話想同佢生個仔：「第一胎都係女，後來我哋控制飲食同計好行房時間，真係生到個仔，諗住爸媽都會好開心，因為係長子嫡孫嘛，點知爸媽都冇畀錢嗰個女人（兒子媽咪），我惟有自己畀囉。」佢亦唔認自己係大少，話一直喺爸爸嘅公司打工：「我都係靠份糧咋，嗰時連買部車都要問佢，因為佢從來都未交過財政大權出嚟，但係佢嘅節儉同低調係難得嘅美德！至於將來會唔會將娛樂同地產生意交畀仔女，佢就話：「要跟住社會同環境變，唔一定要交畀自己人，但係我啲仔女未得，我有教，但係佢哋唔聽。」
撰文：馮仁昭
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24