王維基嘅電視夢，因為蘇錦樑一句「一籃子因素」而粉碎，玩都未玩，就死得不明不白。其實「電視風雲」唔係第一次，78年佳藝電視發起嘅「七月攻勢」，引發嘅電視大戰亦可用兩個字嚟形容──轟烈。
話說78年初，佳視重金挖無綫各部門高層過檔，周梁淑怡做總經理、劉天賜做編劇、盧國沾做宣傳、葉潔馨做導演、林旭華做公關、石少鳴做買片，佢哋被統稱「佳視六君子」。唔止咁，佳視亦狂挖無綫同麗的（亞視前身）嘅台前幕後，令全台人數由最初600人暴升至800人。同年7月周梁發起「七月攻勢」，連續幾日喺多份報章賣全版廣告，大鑼大鼓宣傳佢哋製作嘅節目，包括鄭裕玲同米雪主演嘅《名流情史》、徐克執導嘅《金刀情俠》等。可惜當年佳視收視一般，新衝擊亦未能起死回生，又因投放太多金錢，令營運資金瞬間耗盡。同年8月，佳視六君子引咎請辭，8月22日佳視宣佈停止運作。
不過冇當日嘅電視風雲，亦未必會造就到徐克、譚家明等一班新浪潮導演嘅崛起。
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！