美國兩黨耍完花槍，終於達成債限協議，暫時避過違約，但港股昨高開百點後，由頭隊到尾，埋單倒跌133點。本欄昨文已指，近日市場表現堅挺，早已反映僵局化解的因素，故好消息出貨亦是意料中事。
大市昨日升跌比例為54：46，好友似乎仍佔上風，但其實恒指成份股得9隻升，下跌比率近八成，相當不妙。恒指連出五枝陰燭，弱勢已成，將下試6月以來升軌22900點，如今日不幸失守，將確認短期見頂，戰友宜減磅增持現金。
逆市揀股以超當炒的網遊股行先，新加坡網遊商、創業板新股IGG今日掛牌，概念已夠殺，加上全配售，搶貨搶到癲！聽說即使為包銷商光大，都係得大客先有，首日勢將大炒。戰友與其開市高追，不如吼實同類股份光宇國際（1043）。
上月曾推介過光宇，單日即飆兩成。光宇與韓國網遊商YD Online合作，取得獨家代理權，為中國玩家度身訂造3D網遊，另正籌備10款手遊，其中兩款擬年底前上市。上半年，網遊貢獻盈利6,381萬人仔，全年當賺1.3億人仔，畀15倍PE，齋呢瓣業務已值24億銀，仲未計近日炒爆的新能源電池業務。以30億人仔市值做目標，光宇可見8蚊！
光宇上月由2.40元起步，最高炒至6.56元，昨剛好完成黃金比率0.382倍調整，係時候再上衝。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange