一到10月，最期待萬聖節，皆因攞正牌發洩
尖叫，所以放工即使捱眼瞓排長龍，都要山長
水遠撲入主題公園嗌餐飽。土炮哈囉喂做得出色，但玩多幾年不免會嫌全部估到晒，距離10月31日還有時間，不如快Plan一轉萬聖撞鬼之旅，
感受唔着衫的雞同鴨講驚嚇滋味。
記者：劉連（圖片由有關機構提供）
㗎鬼 殭屍貞子自由行
細膽者今個月6點後唔好立亂走入日本環球影城，因為即使你唔特登去撞鬼，鬼都識上門揾你！今年樂園就出動比往年多三倍殭屍自由行，排起隊上嚟條「殭屍龍」長達1公里，於園內九成面積肆意活動突襲途人；另一方面，日本國寶級女鬼貞子亦正式出沒詛咒園內五項機動遊戲及一間餐廳，包括勁合家歡的「大白鯊」、「未來戰士2:3D」、「夢幻太空之旅」、「烈火雄心」等等，陣容咁澎湃，即使閣下只打算純路過唔玩，估計亦冇可能獨善其身，袋定多幾粒金嗓子開聲好過。
對於一心求嚇的朋友，樂園今年亦準備好三大攞膽設施娛賓。頭號注目的「面具傑森魔血腥餐廳2」取材自經典驚慄電影《黑色星期五》，將在水晶湖露營區發生的慘劇重現，面具傑森魔隨時現身。此遊戲舊年萬聖節初次登場，獲觀眾投選為尖叫No.1，群情洶湧到今年Encore再嚟過！另一邊廂「木乃伊博物館 木乃伊諸神的詛咒 3 」，以電影《盜墓迷城》為背景，模擬被埃及沙漠淹埋的城市遺址，Sell頂級特效攝影技術及視聽效果，驚到木乃伊都嚇返生。嗌完仲有Quota，必排今年七月開幕的「生化危機·現實版」遊戲，雖然唔係萬聖節限定，但驚完一輪有得射番喪屍報仇，心理即刻平衡返！萬聖節全日祭唔係羅蘭姐專利，日本環球影城一早興由日玩到夜，萬聖節活動期間每日下午設40分鐘花車巡遊，大隊從荷李活區移動到紐約區，沿途更大派七彩珠鏈作為獻禮，總數140萬條！今年巡遊更首次加插星探嘉年華，只要打扮得有咁誇得咁誇，就有機會被星探邀請，加入巡遊大隊，幫手興風作浪。
日本環球影城
日期：即日至11月10日
網址： http://www.usj.hk
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange