【牛腩篇】
小弟對英格蘭國家隊搵鶴臣執教，都曾嗤以之鼻，畢竟呢位老帥穩陣有餘，但進攻板斧不足，用人也傾向保守。不過喜見英軍面臨傷兵問題時，鶴臣放開懷抱主攻，雙快翼加埋二閘，溫布萊球場寬闊嘅環境真係「任我行」。
安祖斯唐辛亦因為呢個環境而一戰成名。有留意開熱刺嘅球迷，都知道呢位22歲翼鋒今季打正選好耐，而且呢種左腳打右翼嘅踢法，近年不乏成功例子，上季加里夫巴利都有段時間打右翼；但如果𠵱家就以唐辛同巴利比，仲有好大段距離。
一位年輕球員能夠躍升為球星，出場機會好重要，英超之前唔係冇出過新星，馬捷達、史達寧等都威過一輪，但始終效力豪門，一兩場冇表現就被打入冷宮。唐辛能夠喺熱刺人才泛濫嘅中場搶到正選，實在好難得，但基斯甸艾歷臣、拉美拿等都打得佢個位，副隊長艾朗連儂更加喺10月復出，以球隊今季想爭標，如果唐辛一兩場冇貨交，領隊波亞斯好難唔換人。
效力豪門表面風光，唔使場場踢但周薪幾萬鎊輕鬆落袋，但如果係有野心嘅新人，或者踢阿士東維拉，同一班年齡相若隊友齊齊打拼，嚟得過癮得多。文：牽牛
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24