狼英出席立法會答問大會，一開波就拋出成立政改諮詢專責小組方案，擺明想轉移視線，將馬尼拉人質事件及免費電視發牌黑箱作業鬧劇降溫，行為如此低庄，難怪「人不要臉、天下無敵」呢個金句，可以熱爆全城。
美國民主共和兩黨就債務上限問題，火速達成協議，避過違約危機，華府亦恢復運作，刺激美股爆升，但港股升勢僅曇花一現，埋單更倒跌收場。無他，港股呢個月最差只見過22700水平，完全稱唔上恐慌性跌市，噚日嚟一個反高潮，絕對合理。債務上限問題去到出年2月再傾，今年餘下時間，股市可以減少憂慮。
本報財經版噚日提到，大行第四季睇好內地4G股，預期會受惠國策，剛剛發盈喜嘅TCL通訊（2618），可謂雙喜臨門。集團預期第三季繼續扭虧為盈，營運利潤及溢利按季更大幅增長，主要受惠成功轉型智能手機，9月銷售量更首次突破200萬部，由於強攻中高檔市場，毛利肯定錄得爆炸性增長。假設第三季盈利按季倍增，而第四季增長保持，全年計隨時可以扭轉中期蝕錢局面。睇圖表，TCL通訊正於高位造旗，大有機會配合下周放榜破位，一旦衝穿6.26元，中線可見7字頭。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange