如果畀你揀，最後一擊想邊個起手？ESPN日前搵咗聯盟其中26名球員，喺「籃球之神」米高佐敦、湖人巨星拜恩同熱火「大帝」勒邦占士，3個人之中揀一個去射last shot，佐敦排頭位就唔奇，但竟然冇人揀大帝！占士知道之後，只可以好葡萄咁話：「I don't care！」
波神獲88%支持
呢個「邊個射最後一擊」調查結果顯示，有88%會將個波交畀波神，另外12%就話畀拜恩，兩個加埋已經100%，即係話揀大帝嘅，一個人都冇！就算勒邦占士想喺場上搵呢班人報仇都唔得，因為呢個調查係不記名嘅。其中一個東岸後衞就話：「好似揀緊邊個巨人最矮一樣，我雖然想勒邦占士喺球賽末段有波喺手，但希望佢會將個波交畀米高佐敦或者拜恩，處理最後一擊。唔好唔記得，大帝罰球都幾曳。」
熱火周三喺紐約布魯克林備戰對網隊嘅季前賽，勒邦占士自然成為追訪對象。大帝被問到一票都冇嘅時候，一副「吃不到的葡萄是酸的」嘅口氣回應：「聯盟中嘅球員咁講，由得佢哋囉。其實我真係唔想理聯盟部份球員，點諗我處理最後一擊，我生涯入面都有幾次絕殺得手。我先唔會畀對手有機會，逼到我去要射關鍵波，而且關鍵球員唔係射得入致勝一球就可以做到。」係喇，知你唔高興喇，畀番啲數據你睇，𠱁番你開心得未？
其實，米高佐敦、拜恩同勒邦占士之間，大帝喺最後24秒，比賽平手或者落後嘅情況下，命中率比拜恩好得多；波神梗係最準啦，生涯18次喺呢個情況下起手，有50%中目標，至於大帝就有41.2%，比拜恩嘅25%高。不過講番轉頭，相比現時球壇生態，米高佐敦同拜恩當年強敵林立，比賽好多時未到最後一刻，都唔知鹿死誰手，緊張程度比𠵱家勁得多。所以大帝你都係唔好做葡萄友，專心做好自己去改變人哋諗法啦。
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24