【咖喱篇】
喺球壇，向來不乏明日之星，只要伯樂有心，不求聞達於諸侯嘅小將總可上位。好多人話新人喺英超難出頭，但小弟認為只係英格蘭嘅小將難出頭而已；因為英超聚集咗好多嚟自世界各地嘅新星。
講番伯樂，英超好多領隊都鍾意用新星；最出名當然係雲格，佢一直努力不懈咁培養艾朗藍斯成才，今季都終於俾佢等到。佢迷信新星嗰種執着，仲勁過對拎冠軍嘅渴求。當然唔可以唔提最近嘅大紅人贊奴沙，曼聯領隊莫耶斯見艾舒利楊格打得差，就換呢個18歲小將上位。
睇一支球隊重唔重視新人，簡單啲可以睇佢哋嘅平均年齡。睇番歐洲足協嘅統計，平均年齡較大嘅班霸都係嚟自意大利；包括28.5歲嘅祖雲達斯同埋27.8歲嘅AC米蘭。曼聯嘅平均年齡係26.5歲，同巴塞隆拿嘅26.4歲差唔多，阿仙奴嘅25.9歲，都係同拜仁慕尼黑嘅25.8差0.1歲。另外，冇份打歐洲賽嘅利物浦更加年輕化，平均年齡只得25.3歲。
如果睇全個聯賽平均年齡，英超的確較高，但並非高得恐怖。英超平均26.5歲，意甲26.3歲，西甲26.1歲，而德甲就24.7歲。睇呢個數據，大家最多可以話德甲真係好年輕。文：咖喱
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24