冇啦啦隊、冇打氣banner、着舊款聖保祿中學校隊游泳Tee，但無損15歲東亞運「獎牌之后」何詩蓓噚日揚威九龍公園學界D2泳賽，喺拿手嘅200米個人混合泳（Grade A），以2分17秒58做出全場唯一新紀錄。最意想不到係，下晝壓軸嘅4x50米混合接力賽，因弱聽隊友唔小心偷步而被DQ，詩蓓即時以隊長身份安慰。
「其實都唔緊要，比賽就會有啲難預料嘅事，最緊要整日比賽，我哋個個表現都好好，大家enjoy就得。」
4x50米混合泳，何氏姐妹加兩名中五同學合作，但人算不如天算，負責第1棒、擅長背泳嘅袁同學突然搶先起步而被DQ。佢解釋話：「我本身弱聽，近排耳仔情況唔係咁好，我習慣裁判叫完take your mark之後再數3秒就go。我喊係因為裁判點解唔問我咩事，就叫我上水。」
難得3名接力隊員即時走到袁同學身旁安慰，就算最後一次代表學校嘅詩蓓家姐雅舒都安慰佢。至於全日賽事，詩蓓喺200米個人混合泳摘金，仲破咗江忞懿喺09年嘅2分17秒80紀錄；而雅舒就以50同100米蛙泳兩金成績，告別學界泳賽。
D1泳賽今展開
D1水運會初賽今日喺同一地點上演，男子組連贏20屆嘅男拔萃今屆雖然冇乜星級泳手列陣，不過勝在實力平均，再贏難度唔大。女子組估計繼續一面倒，女拔萃力爭26連霸。值得一提係今日只係初賽，好多強隊喺下星期三（23日）決賽日先見真章。
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24