前排公仔箱推出唔同類型真人騷，有啲講盛女、宅男，有啲又講有錢人點放低身份去試低下層嘅生活，雖然引起唔少話題，不過唔知係咪觀眾睇得太多古靈精怪嘅真人騷，搞到個個都變得重口味，呢個熱潮又突然間消失咗！最近睇開無綫節目《小B大任務》，見到啲3、4歲大嘅小朋友，拎住個袋自己走去超市買嘢，難得有咁新鮮嘅節目，自然受觀眾歡迎。
除咗《小B大任務》外，無綫Good Show台播緊嘅韓國親子真人騷《爸爸！我們去哪兒？》亦都好受歡迎，喺韓國播嗰陣收視好理想，連內地同無綫都買咗版權去重新製作。
星級爸爸冇晒符
原裝韓版嘅《爸爸》，搵咗五個韓國星級爸爸同仔女去拍，包括《IRIS2》演員成東日同7歲囝囝成俊、主持人金成柱同9歲囝囝金民國、《紳士的品格》演員李鍾赫同6歲囝囝李俊秀、歌手尹民秀同7歲囝囝尹厚，以及前足球選手宋鍾國同6歲囡囡宋智雅。
雖然大家未必對佢哋有好深印象，不過喺鏡頭前，見到幾個大男人喺冇經理人同老婆陪伴下，獨力同仔女去旅行，唔只要完成各大小任務，仲要體驗一啲原始純樸嘅生活。平時喺鏡頭前，見到呢啲星級爸爸有型有款，點知對住自己啲仔女就冇晒符！不過佢哋完成任務之後，又俾佢哋啲真情流露感動，觀眾係時候戒重口味喇！
版主：陳基征
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24