上到陸羽，碰到三位名醫，一位名律師，中環出現之「名師」好有機會係港大產品啦，特別係醫師、律師。講甚麼大學排名，其實Times，QS等等排名榜，只係憑表面數據及學者印象計分，左丁山唔會完全相信，世界最好嘅頭三十名大學，一定係在美國、英國，左丁山可以手寫背出嚟，人地資源豐富，人才眾多，與香港根本冇得比，譬如哈佛已有保本基金（Endowment Fund）三百餘億美元，還要聲言在未來十年籌款65億美元，氣概之大，無與倫比。全港八間政府資助院校之一年總經費算勉強只及一間耶魯大學，香港嘅大學要達到世界級，同人地爭一爭，諗吓都得嘅，咪諗多幾十年囉！
不過各地大學對本國本地之影響力及實效，美英排名榜根本衡量唔到，最佳例子莫如日本之慶應與早稻田大學，在任何一個排名榜都名次甚低，毫不起眼，泰國之朱拉隆功與法政大學亦然。如果你係日本人，泰國人，就會瞭解到呢四間大學對日泰經濟、社會政治建設之無可比擬力量。一般日本人、商界人士若知道你係早慶畢業生，立即多幾分尊敬，講生意都容易啲，在曼谷講起朱拉隆功（盛產醫師、工程師、科學家）或法政（盛產政界領袖、銀行家、會計師、新聞記者），就會讚不絕口，懶理甚麼世界排名榜。
講番香港，本地大學最緊要能為本地政治、經濟、工程、醫療、社會作貢獻，支撐整個香港向前。以此觀之，香港大學創校，雖說為中國而立，實則是英國人為殖民地培養本地管治人才而設，過往一百年，港大畢業生對本港之工程建設、醫療保健之貢獻，捨她其誰？過去五十年，中大急起直追，畢業生在金融、工商業、新聞業、藝術音樂之貢獻，亦相當可觀，香港戰後經濟有起有跌，總的來說，經濟面貌變化甚大，兩間大學畢業生之功勞不可抹殺，香港納稅人之投資於大學，回報相當可觀。
回頭講番在陸羽碰到四位名師，問佢地對母校搵英國人做校長之意見，四人都話如果有A君（不論國籍）主動求職，被遴選委員會依足程序，一致同意聘請嘅話，其他人不服，罵A君十分冤枉，要罵只能罵遴選委員會及有權人士無能無知啫！