電視威力真係好大，大到可以影響到一個移民政策，難怪被認定唔聽話嘅魔童王維基攞唔到免費電視牌照啦。話說英國《泰晤士報》噚日報道，已故英國首相戴卓爾夫人嘅前政治秘書John Whittingdale透露，當年落閘唔畀港人居英權嘅戴卓爾夫人，1990年突然改變政策，願意畀部份港人、特別係差人居英權，源於同年喺英國播放嘅電視劇集《Yellowthread Street》。
當年50,000家庭受惠
呢套劇集有幾巴閉，咁有影響力？八方即刻上網搜索，原來係改編自William Leonard Marshall同名小說《Yellowthread Street》，內容背景係英國殖地民香港一個Yellowthread Street差館，講述差人點樣儆惡懲奸，男女主角當然係鬼佬，而參加演員仲有大家熟悉嘅翁虹、黃錦燊，武指係前無綫電視藝員冼灝英。全劇六小時長。
John Whittingdale話，英相睇完有關劇集後，同佢嘅私人秘書Charles Powell講：「皇家香港警察十分勇敢、能幹，英國政府一定要好好善待他們。」當年因為八九民運，香港出現移民潮，戴卓爾夫人早喺1979年落閘唔畀港人居英權，1990年突然宣佈給予50,000個家庭英國居留權，特別係畀曾經從事敏感職位嘅公務員包括警隊政治部，就係受呢部電視劇集影響。
更加好笑是鐵娘子肯改變政策，其實出於美麗嘅誤會；John Whittingdale話，戴卓爾夫人一直以為《Yellowthread Street》係紀錄片（Documentary），唔知道係虛構嘅電視劇集。
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange