莎莎（178）老闆郭少明熱愛賽馬，養馬之餘，每年公司都會搞「莎莎婦女銀袋日」，今年定係11月3日，贊助賽事兼搵埋一班靚女悉心作淑女打扮現身，有得玩又大收宣傳之效。
郭老闆噚日笑住呻兩句，話俾老婆詐型，警告佢喺銀袋日唔好出咁多隻馬，「你知我老婆佢當日要着到好誇吖嘛，每次出馬嘅話，佢就要由個台行落去草地，我就冇所謂呀，健步如飛，但睇到佢行都覺得好辛苦呀。所以佢已經警告我嘞，最多只可以出一隻馬，叫我唔好喺度搞搞震」。
咁就梗係啦，郭太每年都搵時裝設計師鄭兆良幫佢設計靚衫，聽聞今年條裙嘅布料仲係專誠從法國同瑞士訂番嚟，乜嘢款式就要銀袋日先知嘞。盛裝打扮，要走落草地又真係幾狼狽，仲驚整污糟件衫㖭呀。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange