混血模特兒Cara G.、容祖兒、周柏豪等前晚喺尖沙嘴出席Balenciaga時裝活動，已懷孕五個月多嘅Cara依然勤力走兩場搵奶粉錢，喺旁邊嘅準爸爸Jesper笑言已做廿四孝老公同爹哋：「幫Cara放狗、拎手袋，盡量畀佢休息。」
問Cara日忙夜忙，佢笑話：「我朝早返舖，走兩場都有少少攰。」Cara話好開心知道陀B女，預產期係出年3月4號，已計劃喺瑪麗醫院生：「應該會自然分娩，𠵱家都做多啲gym，到時有力推個BB出來，幻想個過程已恐怖，因為B女手同腳都大，驚生到陰裂。」
二人已忙於為BB改名，各有意見，Cara想個名較有男子氣：「睇咗好多書，想搵啲男子氣嘅名，買BB衫唔要太多粉紅色，有啲似cupcake。」在旁嘅Jesper話：「我哋都係多個國家混血，想BB個名有多國元素。」Jesper更自言唔會有吳彥祖想B女醜樣嘅心態：「唔想佢醜樣，會嚇怕男仔。」
祖兒低胸示人
容祖兒着咗件過十萬元嘅低胸裙，更話有黑皮bra打底，佢話性感唔使問男友劉浩龍，年底嘅演唱會會繼續性感。提到香港電視唔獲發牌，佢話：「好慘，可惜，眼見王生好有誠意，裁300人雖然有補償，都擔心有人處境係等開飯。」
撰文：馮仁昭
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24