美國國會兩黨終於趕及係周三嘅「死線」前達成協議，令政府暫時全面恢復運作，而最觸動市場神經嘅債務上限問題，亦押後到出年2月7日至定奪，免除Uncle Sam冇錢還，全世界陪佢一鑊熟嘅慘劇出現。
森姆大叔暫時毋須賴債，雖然暫時消除美債變廢紙嘅憂慮，刺激美元禮拜三彈一彈，但好快就無以為繼，事關市場認為，森姆大叔雖逃過一劫，但歷時16日嘅停擺，已令美國經濟受損，勢必促使聯儲局押後退市，以免經濟受到更大傷害，淡友起舞下，美元噚日明顯受壓，美匯指數落番去79水平。
月底前料炒儲局延退市
德國商業信心升至三年高位，歐元信心指數亦持續向上，加上區內冇乜不利消息，歐元兌美元就由前日低位嘅1.347美元，衝上1.366美元，如果短期數據造就，睇怕有力挑戰1.371美元嘅一年高位。
澳洲紙同紐幣就分別衝上96美仙和85美仙，創逾四個月及五個月新高。澳洲儲備銀行本月會議紀錄話，之前連番減息對經濟有刺激作用，但仍要多啲時間觀察成效，暗示短期唔減息住，消息令市場對澳洲再減息嘅期望降溫，澳元短期仲有冇得升，主要睇內地今日公佈嘅GDP數據靚唔靚仔。新西蘭前日出嘅通脹報告顯示，第三季消費物價按年上升1.4%，高過市場估計，令明年加息機會增加，成推升紐元嘅動能。
至於英鎊，英國9月申領失業金人數大減4.1萬人，遠超市場估計嘅2.4萬人，唔單止係連續第12個月減少，亦創咗12年最大跌幅，就業市場持續回春，市場越來越覺得，英倫銀行唔可能等到2016年先加息，消息刺激英鎊噚日就直撲1.61美元。
此外，受惠違約危機暫緩及炒儲局續放水，資金重投美債，10年期國債孳息昨低見2.61厘，收窄美日息差，搞到美元噚日升到99日圓就無以為繼，掉頭仲要跌翻去97.82，相信短期要上試100有難度。
後市方面，共和同民主兩黨今次玩到盡，搞足16日到最尾個刻至肯調高債務上限，實在有點過火！礙於儲局月底就議息，即距今不足兩星期，係呢段時間內，炒作儲局繼續放水應該係匯市主題，即係形勢不利美元。
上周仍持有的歐元淡倉（1.36美元開倉），最多賬面曾賺130點子，但執筆時已倒輸約40點子，雖然個人估計歐元再升空間不大，但如果不想吃眼前虧，可伺機在有利價位先行離場。
避險作用降 金價易跌難升
另一方面，受到美元下跌刺激，現貨金價昨日曾飆3%，去到每盎斯1,320美元水平，但值得注意嘅係，喺過去兩周美國政府停擺期間，金價不升反跌，反映其避險作用大不如前，加上歐美通脹仍然溫和，後市仍料易跌難升，可於現水平造淡。
奇兵
本欄逢周五刊登
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24