一向都話股市係最現實、最殘酷的戰場，理得你有幾慘，有幾唔抵，香港電視（1137）無份獲免費牌？炒友即閃止血，噚日喪插逾三成。全部走晒去買有線（1097），一日內爆升最多2倍，成交超過12億元。就算前日高位買錯香港電視，只要噚日開市即沽，買有線，都有得賺！
高盛調高友邦目標16%
呢套「現實版」嘅電視風雲，令到港股忘記晒美國債務上限死線將至，內地A股走鬼等烏雲，大市噚日高開後，係咁易跌約百點就完場。反而賣資產的卜蜂（121）就喪升逾兩成，凱升（102）計劃配股抽水都爆升17%，資金趁個市未大跌就亂咁炒，風險真係越來越高。
本欄今日就反高潮，推介一隻穩陣的藍籌股，就係即將於星期五（18日）公佈第三季業績的友邦保險（1299）。近日備受各大行唱好，法巴睇好目標價43元，德銀升目標至42元。
高盛亦發表報告，上調其目標價逾16%至44元，維持「買入」評級。該行指，友邦一半新業務價值增長是來自東南亞國家，短期可能會受匯率波動影響，但長線影響有限，加上東南亞地區增長依然強勁，預計2014年新業務價僅增長仍達16%。友邦破頂後昨收38.2元，已大幅跑贏大市，相信短期再上升空間有限。不過根據以往走勢，高位調整後都能重展升浪，並且一浪高於一浪，屬長線持有之選。
瑪姬兒
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange