活塞未開季就傷兩件後場大將，真係黑過墨斗！繼史塔基俾車門夾爆手指公，活塞日前再有今季新加盟嘅控衞B贊寧斯，因為出智慧齒出得唔好，頂爆顎骨而要唞3個星期。今季球隊大事擴軍，一心重振雄風，點知黑仔成咁，真係冇陰公！
活塞今季簽入J史密夫，仲同公鹿以先簽後換嘅方式，羅致上季表現唔錯嘅B贊寧斯返嚟；一心希望由魚腩部隊，重回東岸勁旅之列。點知今個月初，後衞史塔基湊仔嗰時，唔小心俾車門夾爆右手手指公，雖然手術之後發現唔使休息8個星期咁多，但係就應該趕唔到喺30號主場對巫師呢場揭幕戰復出。
料休息3星期
禍不單行，日前24歲嘅B贊寧斯出智慧齒出得唔好，竟然頂到下顎骨輕微骨裂，要剝咗隻牙之餘，仲要唞3星期，等顎骨復原。底特律傳媒話，因為喺治療期間，B贊寧斯應該唔可以點郁動，預計頭4場常規賽都唔打得，即係揭幕戰極有機會見佢唔到！
睇番活塞賽程頭4場，除咗巫師，仲要對灰熊、塞爾特人同溜馬，場場都係硬仗，靠一個J史密夫真係未必頂得住。如果開季開得唔好，球員信心好有機會受到影響，到時就麻煩喇。
B贊寧斯份約都算係大約，3年2,400萬美元（約1.9億港元），價錢絕對有球隊重心成員嘅份量，突然騎呢咁受傷，焗住休息幾個星期，真係唔抵！𠵱家活塞可以用嘅控衞仲有比立斯同W拜林，相信會由比立斯頂住先；不過，佢雖然有外圍火力，但係已經成37歲，機動力冇B贊寧斯咁好，希望呢位「黑仔」B贊寧斯快啲好番啦！
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24