王維基回應政府拒絕發牌，質問究竟香港仲有冇公義，係講出香港人心聲。
呢單發牌鬧劇，唔單止冇公義，仲連過去應有之招商規矩都一併摧毀，全面向政治讓路。王維基其實別無選擇，只有司法覆核一途，迫令政府解釋推翻通訊局決定原因，王維基告政府，唔淨止為自己，亦係為香港。
政治兩字 累港人陪葬
今次政府擺到明係搬龍門，當初通訊局決定發牌，講到明冇上限，冇話要挑選，當時講明符合規定就會批，到𠵱家就放風話王維基太過進取，有冇搞錯，政府決策可以咁無恥？進取與否並非發牌條款考慮之列，一個投資者進取與否是商業策略，同發牌條件又有何干。王維基跟足招標要求辦事而被針對，梁振英、林鄭月娥、蘇錦樑三人必須向公眾及立法會清楚交代行會推翻通訊局決定原因。日後政府所有招標發牌，勢必變成黑箱作業、無規無矩，公眾必視之為益自己友。
外界一直認為政府針對王維基，才拖延發牌，到無法再拖，就索性蠻不講理，硬砌釘死王維基，更無恥係完全唔需要解釋，「𡁻你就𡁻你」，人不要面，果然天下無敵。結果係要香港一齊陪葬。講到尾，都係政治兩個字累死香港。增發電視電台牌照，從政策上而言，係符合香港利益，多元競爭，激發創意，也可維持自由言論環境。但從政治而言，就唔符合北京利益，多隻香爐多隻鬼。上次數碼廣播發牌，大班已經好醒，搵建制派及西環友做股東，成功暗渡陳倉，但攞咗牌之後，雙方起衝突，最終大班被迫走，另起爐灶做網台，而數碼廣播牌最終也由建制派所有。
DBC事件已預告王維基下場，也從中睇到開放媒體政策不符北京利益，必定遇到各種古靈精怪反對理由，王以為只要標榜非政治化，專心拍劇就可過關，實在太天真太儍。王並非自己人，為求攞牌扮矮仔，唔會有人信，問題關鍵係佢「冇掣㩒」，政府也好、西環也好，冇一樣嘢可以牽制住王維基，點放心畀個電視牌佢，點知佢牌到手後會否立即反面，大搞新聞時事資訊節目，經過數碼廣播一役，自然會更步步為營。
相反，有線吳光正、now李澤楷生意多多，好多時「有偈傾」。大家明白好多人做傳媒，都係為咗用來對沖生意上風險，買政治保險，老闆以呢種心態去營運媒體，其他人就放心得多，因為大家有偈傾。王維基電視夢碎，只因為佢真心做好電視生意。
曾蔭權任內焗唔熟嘅蛋糕，來到梁振英手上，只有焗燶，唔可能焗熟上得枱。「政治」二個字，累死香港！
添馬男
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24