內地酒店房託開元產業信託（1275）老闆陳妙林為慶祝今年7月成功上市，上月中組隊由長春踩單車來港，踩咗28日，噚日抵港。佢相當好傾，一提到中央打擊三公消費，就爆料話，旗下酒店最近不時有紀委官員企喺門口影相，嚇到啲官員唔敢去。
陳老闆透露，曾經有紀委官員要求酒店將餐飲定單交出，但酒店以保護客戶私隱為由拒絕。雖然中央打擊三公消費影響到酒店生意，但佢估計，紀委唔可能日日企喺酒店門口影相，餐飲收入應該好快回復正常。
講番佢踩單車來港，全隊12人，踩咗超過5,000公里，歷時28日先抵港。陳老闆話，單車隊沿途住喺佢旗下四、五星級酒店，順便巡視業務，總共考察咗20間酒店。
老闆駕到，酒店管理層仲唔識做，好好招呼？原來恰恰相反，陳老闆話要跟國家政策，減少公款消費，於是嚴格要求，每人每餐最多100蚊人仔，仲要檢查入貨單，曾經有酒店用咗貴價嘢招呼，俾佢鬧咗一餐。照咁講，中央打擊三公消費的確有指導作用喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange