一個你心儀的女孩，開到聲對你有意思，然後WhatsApp、講電話、約會，對方一直未有抗拒，最後索性花心力花時間力追，誰知最後換來簡單一聲no。呢個時候，唯一解釋：佢玩你。
今次政府同樣是刻意令王維基對發牌有「合理期望」，最後蘇局長拉一拉西裝，左一句「循序漸進」、右一句「一籃子」，官威滿溢說聲no就算，死因係乜唔同你講呀！又點？
明明一開始發新牌係為促進競爭，偏偏局長就話5個台太多，會拉低節目質素。觀乎目前只有獨大的TVB及不提也罷的ATV，市場根本無競爭；即使5台太多，又為何偏偏是香港電視（1137）out？
目前電視質素已低無可低了。局長美其名「有秩序發展」，說穿了，就是汰強留弱，保持現狀。政府不喜歡競爭嗎？香港5間電訊商得中移動（941）冇3G頻譜。政府嫌電訊市場競爭唔夠勁，於是打破慣例，將三分之一3G頻譜重拍。電訊商亦唔應該對頻譜續期抱有「合理期望」。
事實反映，港府已唔介意血淋淋咁話你知，香港營商，政治行頭，公平第二，怪就怪你唔係中移動和亞視。當港人連想睇電視都要上街，誰還可對政府抱有「合理期望」？
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange