前日金手指孫柏文介紹嘅先思行（595）單日爆升過八成，公司否認咗小米入股，唔理，噚日照升，勁呀！反映市場真係好like呢類型科技股。既然係咁，短線要睇實隻宏霸數碼（802）。先旨聲明，揀佢唔係炒華懋概念，而係睇中佢𠵱家嘅主業——生物識別及射頻識別產品。因為食正𠵱家手機界炙手可熱嘅生物識別特徵容貌識別及指紋鑑定功能，而先思行同世達科技（1282）近期都係炒指紋識別科技，但後兩者已經炒到近1倍同2倍市賬率（PB），但宏霸𠵱家先至係0.3倍PB，3億市值，嘩！殼股都不如！最關鍵公司近期係咁賣嘢，應該係做嘢，如果一個唔覺意俾一間大科技企業睇中，股價最少睇1.47元。
主攻指紋識別唔嘢小
其實宏霸已同小甜甜、陳振聰無乜關係，因公司舊年4月以8,870萬元注入MGIE股份，代價以發行換股債券支付，兌換價每股0.85元，呢單注資喺舊年7月通過，兌完晒啲股後，新大股東係Crossover Global。呢間Crossover Global係由三位IT高人控制，其中一位係叫陳駿輝，佢同國內猛人關係非常密切，當中包括同富力地產（2777）創辦人張力個仔張量關係非常之好，淨係呢個關係已經可以諗好多嘢！
Crossover Global手貨都唔平，每股嘅成本係0.85元，而現價只係0.36元，估計新大股東唔會咁傻仔繼續輸落去囉！事實上，公司近期積極賣嘢似有所圖，今年5月，公司以2,900萬元出售從事語言翻譯嘅I-century，同月再以2,000萬元出售果糖業務；今年9月，公司以4,525萬元出售北京海淀區辦公座物業。今年7月，公司更換主席同非執董。成個鋪排好明顯係售賣資產淨身，以迎接大注資或出售股權，不過如果真係賣，起碼要每股1.47元。因佢現價只係0.36元，得3億市值，剛好係殼價，但仲未計佢啲資產。截至今年6月底止，佢嘅NAV係1.11元，加番個殼價上去，就係1.47元。
其實宏霸係勁過先思行同世達，因為仍佢好早已經研發指紋識別系統，海關嘅E道就係其產品。𠵱家嘅主要產品完全係微軟等大科技公司所需要嘅嘢，例如FxSeurce Book，具有保安存取嘅生物識別特徵容貌識別同指紋鑑定功能嘅手提電腦；BioMirage Coffer備有保安存取嘅生物識別特徵指紋鑑定技術嘅個人保險箱；FxGuard Windows Logon係生物識別特徵容貌識別軟件，用以進行電腦存取保安控制。呢幾樣產品，𠵱家正好食正近期呢個手機熱潮。如果我係小米甚至乎係微軟，宏霸咁平，用十幾億元就可以買起佢兼買起佢啲技術，真係仲着數過買先思行！
總括而言，宏霸具備殼股加科技雙重概念，幅圖又對辦，近兩日有成交突破咗條長期下降軌阻力，反映收齊貨做嘢！第一個位先睇大股東成本價0.85元，第二個位睇1.47元。
陳承龍
本欄逢周四刊登
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24