免費電視牌照塵埃落定，有線寬頻（1097）成為大贏家，股價爆升1.6倍，市值增至24億銀，輸家香港電視（1137）股價急插34%，市值得番16億銀。翻查香港電視截至今年2月底止中期業績，手頭淨現金連債券總值23億銀，假設香港電視已將現金全數燒光，單計債券每股值1.8元，相信亦係香港電視噚日喺呢個水位有支持嘅原因。咁究竟香港電視仲買唔買得過呢？觀乎王維基喺記者會上講，佢唔會搞收費電視，但就會繼續力拓創意工業，證明佢團火未因冇牌而熄滅。佢之前搞城電有聲有色，要打翻身仗其實話都冇咁易，cash價嘅香港電視絕對值得憧憬，當然幾時先有回報，就要考大家嘅耐性。
執筆時，債限談判仍未有定案，越接近死線，市況肯定越波動，怕chok嘅戰友可考慮買入防守性較高嘅股份。主要提供數據中心服務嘅新意網（8008），上周以4.28億銀，購入將軍澳工業村數據中心地皮，每呎樓面地價904元，較市場下限仲要平四成，擺明執到筍貨。集團講明，地皮將興建高端旗艦數據中心，為未來業績提供保證，早前急升後正在回氣階段，可候完全回補裂口後、即約2.3元吸納，有超過4厘息打底下，中線贏面甚高。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange