無綫劇集《巨輪》收視唔錯，陳展鵬同鍾嘉欣呢一對幾為人受落，唔知大家追劇時有冇留意，展鵬飾演嘅喬天生幾乎集集都有左手摸右邊耳仔嘅小動作呢？有唔少網民早就留意到，仲將展鵬呢個小動作同陶大宇當年喺無綫劇《心花放》嘅經典掩眼動作相提並論㖭。噚日問過展鵬，佢話呢個小動作係刻意加上去嘅：「想交代其實喬天生本身心地好，佢都有怕醜、孩子氣嘅一面，呢個動作只係喬天生至有咋！」
否認戀嘉欣BB
呢排展鵬真係好旺，傳完秘婚、同貝安琪撻着後，又因車載鍾嘉欣BB時撞車而傳兩個秘撻一個月，不過展鵬無奈話：「係順路車埋佢箒，呢排都大鑊，緋聞、撞車樣樣齊！嗰日喺澳門觀音廟祈咗福，唔想再有事發生，要小心啲。」
至於喺外地放緊假嘅嘉欣BB亦否認同展鵬撻着：「嗰日去澳門宣傳撞車後，都預咗傳媒會做封面，真係冇呢樣嘢囉！嗰日展鵬順路車埋我，我因為遲到至跑上車，唔係鬼祟，當係劇集宣傳啦。」嘉欣BB鵝公喉咁嘅聲解釋，原來佢發燒喉嚨痛，但不忘玩展鵬：「佢呢期好惹緋聞，大家要小心展鵬呀！相信好多單都係流料。」佢仲話自己喺《巨輪》表現唔錯，希望大家留意佢嘅工作喎。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！