【電視風雲】
【本報訊】香港電視不獲發免費電視牌照，旗下700名台前幕後員工得知消息後難免百感交集，憤怒、失望、徬徨、無助、不滿的情感都湧上心頭，昨日同事間都互相慰問，據知正在拍攝的劇組今日將暫時停工，而部份員工更發起穿黑衣上班，以示對政府的不滿！冷靜過後要面對現實，當日有幕後人員義無反顧從無綫跳槽，亦有具知名度藝人過檔港視，如今剛巧部份員工的合約陸續於本月至明年三月屆滿，前路茫茫，留低還是撤走？雖然王維基昨未就事件表態，但大部份藝員仍表示願繼續跟隨他。
記者：楊潔雯 何慧斯 黃曉妍
過檔香港電視的林嘉華認為政府應交代港視哪項條件不符合發牌，他甚至不想用針對二字：「𠵱家雖然公佈咗，但唔代表電視台風雲就此結束，嘈喧巴閉唔係解決事情嘅方法，應平心靜氣去傾。我對公司好有信心，我覺得好嘢應該保存，嚟緊我都繼續開工，絕對冇擔心將來，我對王生有信心。」
跟無綫鬧翻跳槽的姜文杰表示極度失望及心痛，也不擔心將來，他坦言：「作為市民，梗係唔希望政府令一個投資者俾啲唔清楚嘅程序搞到血本無歸，事實擺在眼前，如果我哋呢幾百個員工有乜嘢事，政府呢個決定究竟有冇考慮到呢。」姜文杰更在微博貼黑白相當哀悼。只簽部頭約的夏雨也對未獲發牌感可惜：「王生令電視行業有生氣，唔發牌俾佢絕對係大家損失，因為做得最多係佢。」關寶慧真情流露稱：「真的哭了！是甚麼準則？為何會這樣？人在做，天在看嗎？ 」
黃日華女兒：大家團火未熄
黃日華表示感激支持港視的觀眾，又透過助手表示很多事不到他擔心和能理會的範圍，他只會做回自己，其女兒黃芷晴則說：「我同爹哋一齊睇電視，睇到個結果好失望，𠵱家我未諗將來，只好留意進展，我feel（感覺）到大家嗰團火都未熄，仲好團結。我手頭仲有工作，其他等公司安排，我支持王生嘅任何決定！」
由無綫過檔香港電視的艾威得知結果感到失落，他坦言：「公司、同行、觀眾都失望，但我相信王生會有準備，唔會丟晒啲劇，可能條路係難行，唔多唔少會擔心，我都希望其他同事有所準備。」他透露明年三月便約滿，曾與公司初步談續約：「𠵱家咁樣見步行步啦！」黃美棋說：「我有啲同事好徬徨，因為有啲啱啱出道，有啲係喺第二個電視台做咗好多年轉過嚟，但我好樂觀，總之睇公司決定先再諗下一步，我係公司一分子，會支持公司嘅行動。」剛拍完《導火新聞線》的周家怡感到失望：「我哋一直好努力拍嘢，點解我哋冇份？我相信我哋所有人會一致支持王生，我仲傾緊新約，應該會繼續做，但要睇公司點處理，總之會堅持。」而周俊偉聽錯新聞，及後才知空歡喜一場。周子駒貼香蕉相暗示叫政府「食蕉」，又留言：「越來越荒誕，係時候移民火星啦。」
香港電視製作劇集
港視藝人力撐
關寶慧：
「真的哭了！是甚麼準則？為何會這樣？人在做，天在看嗎？ 」
周家怡：
「點解我哋冇份？我相信所有人會一致支持王生，我仲傾緊新約，應該會繼續做。」
黃美棋：
「我有啲同事好徬徨，因為有啲啱啱出道，但我好樂觀，總之睇公司決定先再諗下一步。」
姜文杰：
「事實擺在眼前，如果我哋呢幾百個員工有乜嘢事，政府呢個決定究竟有冇考慮到呢。」
艾威：
「公司、同行、觀眾都失望，但我相信王生會有準備，唔會丟晒啲劇，可能條路係難行，唔多唔少會擔心。」
林嘉華：
「𠵱家雖然公佈咗，但唔代表電視台風雲就此結束。嚟緊我都繼續開工，絕對冇擔心將來，我對王生有信心。」
增發免費電視牌照拖延4年
2009年第三季：
前廣管局聽取意見，認為需增發牌照
2009年12月31日：
城市電訊提交申請
2010年1月15日：
有線的奇妙電視提交申請
2010年3月31日
：
Now的香港電視娛樂提交申請
2011年中：
前廣管局完成評核，向行政長官及行會建議增發三個牌照；亞視提司法覆核
2011年第三季：
城市電訊向亞視及無綫挖角
2011年10月：
有線表示2012年會透過奇妙電視轉播倫敦奧運賽事，及後因牌照未批，宣佈在有線才能觀看
2012年3月：
高院駁回亞視司法覆核申請
2012年11月28日 ：
立法會通過議案促請當局2013年3月前發牌
2012年12月：
城市電訊宣佈新電視台將命名為香港電視網絡
2013年1月：
無綫入稟高院司法覆核
2013年5月：
高院駁回無綫司法覆核申請，無綫提上訴
2013年7月：
政府突然要求三間申請機構提交補充資料
2013年10月15日：
政府宣佈向奇妙電視、香港電視娛樂發牌；香港電視網絡落空
資料來源：《蘋果》資料室
蘋民洗版
Bobby Lai︰
當生活空間被大陸人逐步進逼時，政府就同你講「包容」；當你連選擇領導人管理香港都無權無票時，政府就同你講「循序漸進」；好了，直到我連看哪個電視台的選擇權都快要被剝奪，政府就關人隱事，好一句「保密」。再下一步，除了用腳去向政府說明大家的立場，別無他法。
Tamara LY Wong︰
對於自由行，你話香港仲應付到；對於學位，你話香港仲應付到；但居然「五個免費電視台」對於香港來 （嚟）講係太多？呢個上下一心一齊做到「沒有最廢只有更廢」的政府，連市民咁簡單的娛樂都要剝奪囉！
Wing Richly Liu︰
𠵱家香港你越有心思、越進取、越有創意、越有野心政府就越打壓！香港已經係一個只可以容納奴才、刷（擦）鞋仔生存的地方！
雲影軒︰
就算個餅只可以發多2個電視牌照，我唔明點解係發另外2間。真係唔覺得香港電視係咩（乜嘢）條件上輸俾另外2間，輸在本身冇收費電視？
節錄自蘋果日報facebook留言
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24