fb status要時時update，搭飛機梗係最好次次upgrade。但upgrade當然唔似update咁輕易，有錢更加唔係話晒事。話說日前國泰航班上，發生一單upgrade小風波。
自稱擁有瑜伽教練資格嘅楊先生，現兜兜攞住成叠錢要求upgrade不成，仲俾機長趕落機，心生不忿嘅佢被逐後即席拉筋，一顯身手，將隻腳放喺頭上伸展定氣。
同機長理論不果
呢位自稱40歲、最鍾意着白衫白褲、從事期貨買賣嘅拉筋男同八方講，佢原本坐前日晏晝4點10分起飛嘅國泰航班CX840，由香港直飛美國紐約。
由於佢當日炒股賺咗唔少錢，所以想由原本嘅Premium economy class，upgrade坐Business class舒服啲，唔想腰痠骨痛。佢話當時手頭有好多現金，所以想現兜兜補錢升呢，但最終唔知點解俾人趕咗落機，想同機長理論又不果；氣頂被逐後，自己即場拉筋relax吓喎。
國泰：有人語帶威脅
嘩，咁豪氣嘅客人都下逐客令，國泰到底搞乜鬼？國泰發言人回應呢班航班出發前，有乘客向機組人員表示身體不適，當場要求升呢至商務客位，但由於言語帶有威脅性，基於安全理由，先叫嗰名乘客離開機艙。
八方其後再問拉筋男，佢堅持冇講任何威脅言論。八方估計，或者一切緣於佢同機組人員嘅對話有火花都唔出奇。但國泰最終都安排拉筋男改搭噚日嘅航班飛返紐約，睇怕搭完長途機，佢都要拉番一陣筋先得。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange