所謂一朝被蛇咬，十年怕草繩，皇家馬德里04年收購英格蘭中堅活基治，點知買咗個病壞番嚟，今次出到1億歐元收購威爾斯翼鋒加里夫巴利，自然更加小心；有傳巴利就算真係因腰傷問題而提早退休，皇馬都可以向保險公司拎到大部份轉會費。
可獲9千萬歐元賠償
巴利因傷冇份代表威爾斯踢世界盃外圍賽，不過仍然成為呢期國際足球新聞頭條人物。事緣係西班牙《馬卡報》上周嘅一篇報道，巴利腰椎間盤骨突出問題嚴重，今季可能未必可以上陣，甚至要提早結束球員生涯。皇馬大嗱嗱拎1億歐元（10.5億港元）從熱刺收購佢，咁咪人財兩失？
好彩西班牙另一份報紙《機密報》就講，其實皇馬一直以嚟都做好風險管理，每年都拎450萬歐元幫全隊買保險，雖然短期嘅受傷冇得claim，但遇到大傷大病要休息1個月以上就可獲賠償，好似馬些路之前因傷缺陣超過1個月，皇馬已經獲得120萬歐元賠償；08年皇馬從基達菲簽入中場迪拉列達，但後嚟發覺呢位球員有心臟病，被迫提早退役，最終皇馬都攞到600萬歐元賠償金，所以今次就算巴利有咩頭暈身㷫，皇馬都起碼攞返9,000萬歐元作補償。
腰傷無礙周六可披甲
巴利𠵱家只得24歲仔，我求大俠都唔想佢上季喺熱刺逢人過人，同埋重炮射門變成絕響，始終足球員都要喺足球場先可以大放光采。皇馬會長佩雷斯拍晒心口話，巴利腰傷一啲都唔嚴重，只係傳媒誇大，佩雷斯仲話問過晒啲醫生朋友，指巴利嘅問題對足球員嚟講係非常普遍，仲話佢會喺周六主場對馬拉加嘅西甲復出㖭。威爾斯國家隊領隊高文都話，巴利因為受傷缺陣季前熱身賽，先至令狀態唔及上季，只要有番常規練習同比賽，好快就會回復狀態。
不過皇馬為咗巴利，點都已經付出巨額轉會費同人工，佩雷斯為咗開源，準備開闢更多市場，最新目標就係計劃去印度開足球學校，又安排元老隊到當地友賽，不過，印度話就話有12億人口，但國家主流運動係木球，皇馬要打入印度市場未必咁易。
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24