行為一向飄忽嘅劉以達，近年由好友Anita幫佢接工作，但日前Anita發聲明話上月28日開始同佢失去聯絡，有幾樣工作仲受到影響，會同達哥脫離合作關係，噚日達哥終於蒲頭喺新蒲崗拍電影《當C遇上G7》宣傳片，心情唔錯嘅達哥仲拎住支結他唱歌，問佢點解會失蹤？佢即話：「冇，我知佢搵我，係冇覆佢，冇嗌交，大家係要冷靜吓。」佢話其實大家冇白紙黑字簽做經理人，舊年開始合作到𠵱家，都覺得係時候，不過都感激佢好幫得手，有時自己係要人推先去到高潮位。
問達哥係咪失場搞到對方有損失？佢話：「我冇話失蹤，亦冇話擘面，根本就冇工作，但我都當佢係朋友。」至於失蹤前有冇傾好唔合作？佢話呢排要準備唱片，作息時間亂晒，自己又沉迷砌模型，瞓咗兩日就搵唔到，同埋大家都冇正式簽約，所以冇特登去講，不過都有少少遺憾同唔開心。問佢係咪冇咗個朋友？佢話可以咁講，但之後一定會搵佢，不過唔想咁快。
吊飯貪浪漫
達哥又感慨話做呢行咁耐，成日同人不歡而散，可能要唔好咁自我，希望之後快啲搵到經理人幫手。講到有雜誌話達哥喺旺角買咳藥水，佢話自己衰唔瞓覺病咗，有一日把聲沙晒就去買支勁嘢瞓覺，下次應該去睇醫生。報道話佢困住自己，兩公婆喺村屋嗌外賣吊飯入屋，達哥笑話：「唔覺得好浪漫咩？其實係因為貪玩。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！