上周五推介嘅時捷（1184）宣佈，股東台灣鴻海向另一股東鍾信明購入1,600萬股，交易完成後，鴻海將持有時捷23.4%股權，僅次於大股東嚴玉麟嘅30.41%。以鴻海喺手機及電子產品嘅全球代工領導地位，時捷今次獲增持，絕對係百利而無一害，未來定單肯定滾滾來，消息一度刺激時捷炒高14%，現價年度化市盈率8倍未夠，依然超值。
十一黃金周完結，有澳門賭場營運商表示，當地賭場及酒店丁財兩旺，刺激濠賭股繼續向高位進發，英皇娛樂（296）上周五搶高近3.8%，收報4.13元，再創近九年新高，憧憬本月博彩收入闖高𥧌，以及估值平絕同業，再上一層樓難度不大。
英皇娛樂主要喺澳門經營英皇娛樂酒店嘅賭場及酒店業務，截至3月底止，全年盈利8.1億銀，按年增長9.4%，博彩及酒店業務收入分別升14%及9.7%。雖然今年累積升幅達1.2倍，但現價市盈率僅9.7倍，比起六大賭股平均嘅27.6倍，大幅折讓逾六成，絕對係平通街之選。英皇娛樂底子亦強，手頭現金達20.1億銀，相當於市值近四成，含金量極高，現價息率有三厘，防守力一流。戰友可候回試3.9元水平吸納，博高處未算高。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange