前排無綫劇《衝上雲霄II》有唔少熱門話題，包括劇中「Head姐」江美儀同「Roy」馬國明嘅重口味姊弟戀，佢兩個雖然只係相差幾年，但就俾人形容到「母子戀」咁誇張，其實論保養，44歲嘅江美儀唔比39歲嘅馬國明差囉！
美儀早前幫張兆輝嘅美容公司做護膚品代言人，甚少露肉嘅佢，為咗老友大騷事業線，同鄭秀文有幾分似嘅美儀即刻變成谷胸版Sammi。雖然性感，但當日嚟撐場嘅男友吳君祥都冇詐型，仲讚女友正㖭！一向勤保養嘅美儀話：「其實年紀對𠵱家嘅女性嚟講唔係問題，只要勤護膚，keep住身形，四十歲仲有青春，我相信只有懶嘅女人，冇唔靚嘅女人。」
馬明自讚有活力
另一邊廂，Roy不讓Head姐專美，馬明亦做男士美容中心代言人，以前皮膚麻麻嘅佢近年好努力保養，加埋冇乜壞新聞，好快成為圈中嘅筍盤。
馬國明笑言︰「其實我一直以來嘅戲路都比較年輕有活力，睇嚟似30歲出頭，好開心。」馬明keep得好，即搞到同大佢幾年嘅美儀扮姊弟戀講到變母子戀，所以話保養都好重要！
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！