本欄9月24日推介華彩控股（8161），至上周五累積升咗超過60%。呢轉推介啱啱新鮮熱辣，完成咗分拆嘅華夏醫療（8143）。
華夏主打祖國三家先進醫院經營及管理，兼透過上星期五分拆主板嘅萬嘉集團（401），從事藥物保健品批發、分銷及連鎖店業務。
萬嘉收益肥仔水
呢次華夏唔整體升格主板，而搞分拆，似乎想將市值、資產增值攞到最大化，阿媽華夏點計都有着數。事實都係咁，萬嘉上市首日，華夏應佔萬嘉市值，已經上到3.3億銀，仲要大過華夏總市值2.4億銀。除咗佐證華夏價殘，萬嘉價值得到釋放，亦係重點。
又在阿爺「十二．五」底下，尤其針對非公立醫療業務，係重點支持瓣數之一，而祖國可支配收入年複合增長率達到14%，大環境對華夏及萬嘉非常有利。華夏亦講明，「將開始取得豐碩之成果」。
咁睇，華夏自己有靚仔業績，已經係支持本身股價表現最有利驅動器，再加埋日後嚟自萬嘉業績增長及股本資產升值，更加肥仔水。
上星期四，華夏主席翁國亮，完成認購1.2億銀嘅可換股優先股，每股兌換價0.238元。華夏連分拆除淨，現價（0.223元）低過換股價。斷估呢批優先股，唔係擺喺到等煲醋，大、小股東也好，有業績，股價大升，大家先攞到最大增值。華夏係等升！
係咁意估華夏今年EPS增長20%到4.3仙，預期PE得番5.2倍。又華夏最新NAV 0.59元，現價大折讓62%。講基本面，亦已經有條件翻一番。上到0.45元計，PE得10倍，PB未有耐到1倍。
錢雋
細價股專家
本欄逢周二、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange