【中環】賭王何鴻燊同三太陳婉珍所生嘅細仔、亦即係超蓮孖生細佬何猷啟，幾個月前被傳疑似斷背，不過事後佢家姐超蓮即刻幫細佬澄清，話猷啟有好多女友。雖然超蓮話猷啟多女友，但呢幾個月好少見到猷啟同女仔行街約會，反而上星期五晚見佢同成班男女朋友去中環Soho區夜蒲，猷啟仲high到飲醉酒，喺街度扮「柱男」㖭！
朋友笑太渣
上星期五晚11點，記者喺Soho區一間酒吧見猷啟同大班朋友蒲吧，初初清一色似係外國返嚟嘅ABC男仔，冇幾耐就有幾個拖住篋嘅女仔嚟到，似乎係猷啟喺外國返嚟嘅同學，一落機就跟猷啟同成班朋友見面。蒲吧當然唔少得飲酒，成班人又香檳又白酒，飲得相當高興。不過，猷啟酒量似乎麻麻，飲到凌晨12點左右，佢就頂唔住要走先，搞到有啲朋友都笑佢話：「唔係咁快就走呀？咁渣㗎？驚呀？」猷啟冇畀朋友大到，依然都係走人先。
不過，見佢行路浮吓浮吓，又不時頭耷耷，好明顯係飲醉。佢不停打電話催司機快啲嚟，最搞笑係佢之後攬實街邊條鐵柱轉嚟轉去又揈嚟揈去，跟住直情成個人挨喺條柱度發吽哣，真係醉得好緊要。好在大約10分鐘後佢司機終於嚟到，猷啟可以返屋企「覺覺豬」。
採訪：楊浩賢、徐錦池
攝影：畢紹基、李志明
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！