美國債務危機上星期五終於有曙光，刺激港股長假期前爆升幾百點。不過，民主共和兩黨星期日開完會，最終都係得個桔，談判仍然陷入僵局，嚇到道指期貨即刻急瀉逾百點。
而噚日內地公佈9月份通脹按年升3.1%，超過市場預期，A股就無乜反應，滬綜指微升0.4%，收報2237點，暫守2200關。港股喺外圍氣氛未明前，都好難有明確方向，今日想繼續爆升都幾難！
競爭激烈 竟睇升八成
事實上，近日強勢股都開始回吐，弱勢股就想偷雞炒高。不過，弱勢股並唔可以亂買。就好似創維（751），雖然係內地最大電視生產商，但最新公佈9月份電視機銷售量及銷售額都大跌逾一成，搞到股價反彈失敗，上星期五收3.66元，較今年5月份最高位6.56元，蒸發逾四成，真係弱到無朋友！
摩通喺長期前，仲發表報告叫增持，雖然目標價由7.5元降到6.7元，但距離收市價仲有超過八成上升空間，就真係太誇張啦！點解會咁睇好？該行話創維估值夠晒吸引，家電補貼的不明朗因素又在慢慢消除，加上電視機需求已經回復正常，所以對創維睇高一線！
老實講，內地傳統電視機已開始萎縮，又有咁多品牌競爭，創維都好難回復當年勇。雖然已同阿里巴巴合作賣智能電視，但幫助有幾大都未知數。加上又無基金入市谷股價，摩通又未免睇得太高吧！
瑪姬兒
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24