入讀港大文學院遼寧省高考女狀元劉丁寧日前退學回老家，準備再考高考，以報讀北大中文系，事件引起內地網民熱烈討論，不少人表態支持劉丁寧，將一件本質上屬學生三心兩意、出爾反爾事件炒作成為北大優於港大。事緣該學生曾表示棄港大選北大，係因為想追求更純粹的國學，此言論自然令人想到港大中文系「立雜」，唔夠純粹。
高分低能 僅考試能手
呢位學生7月上內地電視節目，已暗示自己會改變主意去北大，當時仲未開學，為何不趁早轉軚呢？港大收取內地生，已佔用了本地學額及資源，坦白講，內地高考狀元，有乜嘢咁巴閉？𠵱家仲畀佢休學，隨時可以復學及繼續攞獎學金？如果佢認為北大更適合自己，OK，咪退學，no big deal，但仲要留定後路，佢隨時可以申請返港大，繼續攞獎學金，咁就實在太「包容」。因搞學生會、情緒病、適應問題、疾病、家庭巨變、經濟能力等原因申請休學是合情合理，但若果因為「我想入讀北大追求更純粹國學」，我認為並非休學兼保留獎學金理據，港大應不予批准，狀元應該退學返內地。
大學生被視為成年人，每個人都需要為自己選擇負責，但每個選擇都要付出成本代價，正因為有機會成本，大家先會認真作選擇。一旦留有退路，可以反悔又反悔，只會助長任性自私行為。早前我曾經指，內地尖子學生「高分低能」，實用主義掛帥，狀元退學事件又一例證。此等考試高手，內地所謂「尖子」，不過是普通學生一名，正如香港每年會考狀元，多少人一世庸庸碌碌，內地高度重視考試，先至視「尖子」為精英，將退學事件視為大新聞。更奇怪炒作一輪，內地媒體多認為要愛護女狀元，不應給予太大壓力，簡直精神分裂。
北大中文系有毛左孔慶東大教授坐鎮，此君歌頌北韓、文革樣板戲，視香港人為殖民地奴才，痛擊香港殖民奴才心態，成功引起中港矛盾，反蝗運動也由他而起。北大中文系有此特立獨行、學養高尚之學者，國學功力自然更純粹，他公開表示希望由媒體牽線，令女狀元與孔慶東本人聯絡，為她安排入學，女狀元日後如能追隨孔教授，學習最純粹之國學，將來定必成材，總好過來殖民地第一學府浪費光陰。
尖子培育此等「國情」，港大新校長馬斐森履新後，應多加了解及檢討，今後不應再盲搶狀元尖子，強行派發獎學金，所謂尖子，來港沾染不中不西惡習，既要上網學習，校園又經常討論「佔中」，令人煩厭，搞不好糟蹋了內地尖子，有負國家重託。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange