新世界發展（017）創辦人鄭裕彤出名愛鋤D，早年他與華置（127）主席劉鑾雄、「重慶李嘉誠」張松橋等好友出席恒大地產（3333）上市推介會，在貴賓房等候的短短十幾分鐘都要鋤兩手。原來他三十幾年前已定期包房跟友人鋤D，長和系主席李嘉誠都是他鋤D友。
63歲的東湖海鮮酒家創辦人黎汝森未創業前，七十年代尾曾於銅鑼灣富萬年夜總會酒家（已結業）做小菜部廚房主管。他爆料指，1977至79年彤叔每星期兩次包房鋤D，周六就攜愛妻在此吃晚飯，每次去到都會先問森哥「今晚食乜」。
富萬年當年設於海天商業大廈，即現時信和廣場的位置，設有四層，地下至四樓分別為大廳、宴會廳、舞廳及貴賓房。
森哥憶述，彤叔當年每星期兩次在四樓包房鋤D，通常由下午5點玩到凌晨，鐵腳有創興銀行（1111）家族的廖烈文、廖烈武。森哥曾經有兩次被喚到貴賓房，發現誠哥在場，方知誠哥都是彤叔牌友。
當時是魚翅撈飯的年代，富豪平日食飯傾生意，鮑參翅肚食到厭，朋友聚會就以清淡為主，森哥笑言「有次佢哋話冇乜胃口，我就整個老鼠班粥畀佢哋」富貴與平實兼備。
愛與彤嬸嘆順德菜
除了鋤D，彤叔每逢周六便化身愛妻號，攜妻在富萬年吃晚飯。森哥形容，彤叔為人冇架子，「彤嬸」周翠英更是一副大家閨秀模樣，相當文靜，兩人多數撐枱腳，兒子鄭家純鮮有同行。既然是兩公婆食飯，森哥通常預備彤叔的家鄉順德菜，森哥是彤叔鄉里，煮起來更合對方胃口。
「每個星期六彤叔問我，森仔今晚煮乜？我就話煮家鄉菜，例如雞蛋焗魚腸、魚腐、鯪魚球，再炒個菜心。如果佢話當日唔開胃，我就用咸魚做菜，有時普通蒸肉餅」富豪對於食，跟平常人無異。
幫襯兩年，森哥聽聞彤叔有次與友人鋤D期間被一班人搔擾，從此搬竇。森哥幾年後亦自立門戶，彤叔曾邀請森哥當家廚，但森哥屬意做老闆，婉拒了。
李華華
mailto:[email protected]
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24