上周末，有單傳言對孫柏文非常震撼。係乜？就係傳內地手機製造商小米，將會入股已經有梁伯韜同走咗去做創投基金嘅阿里巴巴前CEO衛哲做股東嘅先思行（595）。
先思行本身業務，即乜嘢半導體分銷，其實喺幾年前輝煌過後已死咗。咁之後就力爭轉型，舊年用5,000幾萬買啲乜嘢指紋識別科技，又做啲耳筒，冇瓣我覺得掂。唔知係咪公司話事嗰啲都有同感，所以就喺幾個月前批股畀梁伯韜同阿里前CEO衛哲。
傳小米入股
批股畀梁伯韜，你估佢做科技定係做deal？梁伯韜歷年來都勁，俾人睇死嘅劇本，部戲上畫時會有破紀錄咁多人buy，佢係股壇占士金馬倫。咁要搵故仔，就到衛哲出場。佢當年做阿里CEO交換卡片無數，到今日，相信佢打畀大陸科技界任何人，都會聽佢電話，所以搵故仔佢得。
好，咁今日，我學梁心欣咁叫大家不問價追先思行（595）。點解？就係因為市傳小米入股。我第一次聽過小米，係睇本報嘅手機大比拼，小米呢間大陸嘢，居然撼低蘋果！最重要係，連韓佬部三星都輸畀佢！
我呢幾個禮拜周圍咁問關於小米嘅事，由內地高端ibanker用戶，到香港傳媒話事層，至特區矽谷深水埗水貨前線等，小米啲產品有嗰種真buzz。佢抄蘋果嘅感覺，比三星更無恥，不過就賣平你有七成毛利率嘅iPhone一半。小米舊年賣嘅量，已同當年iPhone 3全球總銷量差不多。
先思行得4億市值，冇上市嘅小米就傳值500億，呢單似啲內房來港借殼上市格。小米話事人，即金山軟件（3888）嘅雷軍話小米五年內冇上市計劃，係呀，做deal前講你知等你front run呀？鍾意腎上腺素嘅朋友，今日就不問價追先思行啦！
孫柏文
獨立股評人
http://facebook.com/shuen
本欄逢周二刊出
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24