假日行經尖沙嘴的電話舖，門口一張A4紙罕有地吸引菲菲注意，張紙雞乸咁大隻字寫住：土豪金iPhone有現貨。
曾幾何時，「土豪」一詞係形容一啲恃住有財有勢、愛炫富兼周圍蝦蝦霸霸的鄉紳富豪，一睇就知係貶義。不過呢個詞語早被廣泛應用，依家連商戶都用「土豪金」取代「香檳金」，就知班強國富豪對呢個詞語應該唔會有hard feeling。為了一部機，甚至可以大方地承認「我是土豪」。
蘋果9月推出金色iPhone 5s，人人一致嫌老土唔睇好；不過𠵱家回顧番，蘋果可算係押中寶。蘋果一開始就睇中強國人愛曬命、鍾意金銀的天性，進而限量供應，炒爆部機以增加話題，令部機更加矜貴，從而推高需求。
菲菲喺iPhone 5s推出時講過，雖然Tim Cook創新方面麻麻，但度橋搵銀能力方面絕對唔可以睇小。所以今次部新iPhone單靠「土豪金」，已經成功鞏固喺強國人心目中嘅地位，蘋果今次又贏咗一仗。
不過心水清嘅人就會諗，如果蘋果真係仲有創新好橋，仲點會用呢種花招去谷銷量？當新產品推出時，只係純以滿足土豪虛榮為已任，可見蘋果一早已經變質了。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange