烏克蘭有3把尖刀？當中還包括蘇亞雷斯和科蘭？在網上聽到電台這樣的「擺老烏」，Sorry第一反應真係笑咗出嚟，笑完之後諗諗點解呢位朋友會犯咗個咁嘅「天條」呢，係因為節目太早未瞓醒？係因為照稿讀，寫錯所以讀錯？係有心搞吓笑博聽眾嘻哈絕倒？
如果犯錯呢位朋友最近有睇《回到最愛的一天》呢套戲，一定好恨有男主角嘅特異功能，一有乜做錯嘅或講錯嘅，即刻搵個幽暗地方，雙拳一握就返番去當時嗰度，然後重新再做一次，烏克蘭講番烏拉圭，咁就乜事都冇嘞！其實我完全唔識呢位擺烏龍嘅仁兄，只望你可以「回味」一下，下次做番好啲咁啫，人誰無錯吖，互勉又互抦啦。
睇《回到最愛的一天》呢套戲時其實有啲猶豫，因為《蘋果》娛樂版嘅影評彈到佢一文不值，結果以博一博嘅心情之下入場，值回票價不特止，仲俾佢搞到男人老狗眼紅紅㖭，可能打咗底預咗套戲荒謬，所以容易啲畀佢呢個like。我又唔明，都係講時光倒流，又唔見咁多年來有人投訴過叮噹嘅時光機無聊，反而不知幾多朋友仔成日發埋同一個夢，想自己都飛返去以前點點點……其實套戲分分鐘仲正氣過叮噹，因為最後男主角都戒甩咗有乜依郁就雙拳一握，決定好好地踏實過之後每一日，務求令你離開電影院時唔會有太多天真嘅幻想。導演用一套戲嘅時間去講一個簡單道理，就係後悔無謂！不過呢種人生態度，其實個個球迷都感同身受，終生銘記。邊一個球迷未試過經歷高低起跌；邊場敗仗唔係想一打完就唔認數；邊次輸唔係一吹雞就想自己唔記得；不過嗰邊廂幾唔開心都好，轉個頭就會自然進入「甜的吃，苦的更要吃」嘅狀態，冷嘲熱諷抽水冇有怕，因為運動人有一樣好堅嘅護身符，就係叫做「下一次」，點衰點輸點難頂都好，我哋都知道今日永遠唔會係世界末日，希望永遠在明天。
若果莫耶斯喺連敗之後就發揮特異功能雙拳一握推翻賽果的話，咁就唔會有贊奴沙平地一聲雷爆出嚟咁搶鏡啦，若果唔係之前一路冇波入，韋斯咸一鋪入熱刺3球就唔會入得咁轟烈啦！唔好意思熱刺粉絲，無心抽你哋水，唔好握實個拳頭住，下場你哋對維拉之嘛，好快反底啦。
KEYMAN
now TV主持
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24