澳洲政府09年全球公開招募「大堡礁島主」，半年內只要喺大堡礁吃喝玩樂，得閒寫網誌，就有幾十萬人工落袋，被譽為絕世好工；澳洲老闆係唔係特別大方？最近就有一個住喺澳洲嘅兵工廠學生球迷，出成150澳元（約1,100港元）一場波，請球迷代佢睇阿仙奴歐聯比賽，真係球迷版絕世好工。
要寫報告代玩fb
英國《倫敦標準晚報》報道，一位自稱「Dino」嘅澳洲學生，公開招募球迷代佢睇有關阿仙奴歐聯嘅主場比賽，唔單止波飛錢由Dino出，一場波報酬仲有150澳元；嘩！有英超榜首球隊嘅比賽睇之餘仲有錢收，呢份都算得上絕世好工啦。
不過呢份絕世好工都唔易做，Dino就喺網上打咗幾千字要求，要成功應徵一啲都唔容易。從字裏行間睇得出，Dino唔單止係阿仙奴迷，亦相信係一個有錢仔，佢就自稱因為社交生活太多，喺澳洲半夜先開波嘅歐聯就唔多啱佢。但同時間佢又要保持忠心廠迷形象，接咗佢份job嘅球迷，就係入到阿聯酋球場睇波，幫佢個面書、Twitter等戶口打卡，又要不時更新有專業水準嘅賽事分析，仲要幫Dino媾埋女，即係如果有靚女回覆，仲要識搭訕，留條後路等Dino出擊㖭。
Dino要求接job者最好係法律系學生，又要學埋佢一向用慣嘅詞語，更加要接受為期3日嘅測試，睇埋佢嘅打字速度夠唔夠快，足球知識夠唔夠等，真係難過考文憑試。
1月借洛蘭迪增鋒力
報章就未講Dion請到人未，不過如果想應徵嘅球迷，就最好先認識西班牙前鋒洛蘭迪；事關呢位1米95長人，今季正式加盟意甲嘅祖雲達斯，但正選位唔夠泰維斯同胡仙歷等人爭，搞到鬱鬱不歡，阿仙奴領隊雲格就想明年1月借佢，加強前線調動。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange